Goal thun thiam Everton

Ningani zan khan Europa League Last 32 first leg-ah player 10 a khel Everton chuan Swiss club Young Boys chu 4-1 in an sawp a, second half-ah Everton defender John Stones chu hnawhchhuah a ni.

Young Boys khelmual Stade de Suisse-ah Belgian striker Romelu Lukaku chuan hattrick a siam a, Everton hi Last 16 thleng turin dinhmun ṭha takah a din pui.

Phul lemah chuan

Young Boys khelmual hi phul lem phahna a nih avangin team ṭhenkhat tan inkhelh a harsa deuh ṭhin. English club pawh hian bul an ṭan ṭha lo a, an buai nghal deuh niin a lang. Minute 10-na lekah Young Boys hi French striker Guillaume Hoarau goal thun hmangin hma an hruai nghal.

Goal khat hian Everton muthlu a kai tho chiang hle. An si phurh sut tumin an nawr let nghal a, Lukaku leh Ross Barkley te chuan Young Boys goalkeeper Yvon Mvogo tan hna an siam sak nghal.

Mual veilam sir aṭanga Gareth Barry ball cross chu Lukaku chuan a tauh goal teuh hle. Minute 24-naah Lukaku chuan an si phurh sutna goal a thun a, minute li hnuah Seamus Coleman chuan Everton tan thun belh leh zui bawk.

Young Boys forward Hoarau-a'n goal khungna hun ṭha ṭum hnih hmu mah se Everton keeper Tim Howard-a'n a dan sak ve ve. Minute 39-naah Lukaku chuan a goal hnihna leh Everton goal thumna a khung a, first half-ah 3-1 a ni.

Second half-ah pawh mikhual team bawk an chungnung chhun zawm a, minute 58-naah Lukaku chuan goal khung lina a khung a, a khung tur siamsaktu hi goal hnihna saktu Ross Barkley tho a ni.

Minute 62-naah Everton defender Stones chuan Hoarau a tihtluk avangin penalty a chawi a, hnawh chhuah a ni zui bawk. Penalty hlawhchhuaktu Hoarau hian goal-ah chantirin goal dang luh belh tawh lo. English club 4-1 in an chak.

Chelsea aṭanga pound maktaduai 28 senga an lakluh Lukaku hi Everton tana Europe-a hattrick siam thei palina a ni. Tun hmain Alan Ball, Andy Gray leh Yakubu ten Everton tan Europe-ah hattrick an lo siam tawh bawk.

Enge an sawi?

Everton coach Roberto Martinez chuan, "Lukaku khan Everton tana khelh hi a duh a nuam a ti a ni tih lantirin a khel ṭha hle a ni. A chhuak dawn tiin thu thang tam tak a awm ṭhin a, mah se kan hnenah hian a la awm dawn a ni tih zanin khan a lantir chiang hle. Kum 21 chauh la ni mah se striker ṭhain an neih tur ang hi chu a nei kim tawh hle. Inkhelh leh hunah chuan kan khelmualah a ni tawh dawn a, fans ṭhatak bakah away goal kan neih tawh avangin kan dinhmun a ṭha tawh hle," tiin last 16 thlen a inbeisei thu a sawi.

Young Boys head coach Uli Forte chuan, "Inkhelh a harsa takzet a ni. Everton goal hnihna leh goal thumna kha offside ngei niin ka hria, mah se referee khan a pawm miau si a, kan tan chuan a harsa tawh a ni. Second half-ah sut let ngei tumin kan bei a, mah se goal kan chhuah leh avangin a harsa zual tawh a ni. Football-ah chuan kan duh angin thil hi a thleng vek thei ṭhin lo a, kan chak loh dan hi kan pawm thiam a ngai a ni," tiin referee chunga a lawm loh thu a sawi.