ICC World Cup 2015

Pathianniah India leh South Africa

2015 ICC World Cup-ah India leh South Africa te Pathianni zing dar 9:00 hian Melbourne Cricket Ground-ah an inkhel dawn. Zing dar 3:30 hian University Oval, New Zealand-ah Afghanistan leh Sri Lanka an inkhel bawk ang.
Champion lai India-in an match hmasa berah Pakistan an hneh a, champion tura rinkai zingah chhiar telh an ni. South Africa hi an match hmasa berah Zimbabwe lakah bul ṭan chhe mah se, a tawpah a chak zawkah an ṭang tho.
Group B paltlang hrim hrim hi South Africa leh India tan harsa tura ngaih an ni lo a, anmahni khingpha tura ngaih Zimbabwe leh Pakistan an hneh ve ve mai bakah Ireland hmaa West Indies an mualpho ve bawk avangin an pahnih inkhela chak zawk hian group hmahruaitu nihna chance ṭha tak an nei. Group hmahruai­tu tan super eight-ah Group A-a palina an tum dawn avangin hmahruaitu nih hi final kalkawng sial theitu pawimawh tak a ni.
India hi World Cup-ah vawi­hnih an champion tawh laiin South Africa erawh an la champion miah lo thung. Amaherawh­chu India hi South Africa laka inchhuang thei an awm lo a, World Cup-a ṭum thum (2011,1999,1992) an inhma­­chhawnah India-in chak an la nei lo.
India tan Pakistan laka century siamtu Virat Kohli chet ṭhat leh ṭhat loh a langsar leh ang. World Cup hma lawka Melbourne Cricket Ground-a century siamtu Rohit Sharma lakah India mipui beiseina a sang. Tunhnaia India-in sawisel an hlawh na nasa ber chu bowling-ah a ni.
Amaherawhchu Pakistan an tum ṭumin Indian bowler-te hmingchhiatna thaibo turin kum 24-a upa fast bowler Mohammed Shami chuan run 35 chiah pein wicket li a la a, a ni hi bowling lama India innghahna a ni.
South Africa tan Zimbabwe an tum ṭuma a tawp thleng dam chunga run 138 vawchhuaktu David Miller leh run 115 vawchhuaktu JP Duminy te hi India bowler te tana hna hautak siamsak turin an ṭha tawk. Bowling lamah Zimbabwe laka wicket thum latu an veteran spin bowler Imran Tahir-a'n India batsmen hmaah fiahin a awm dawn.
India tan Ravichandran Ashwin and Bhuvneshwar Kumar te hliam vanga an chawlh hnuin an rawn kir thei tawhin a rinawm a, South Africa fast bowler Dale Steyn chu a hliam a dam tawh bawk.
Eng nge an sawi?
South Africa coach Russell Domingo chuan, "Virat Kohli ringawtah kan in sawrbing thei lo. India hian batting line-up ṭha tak an nei a, Suresh Raina, Rohit Sharma, MS Dhoni leh Ajinkya Rahane te an la nei a ni," tiin India batting line up ṭhat thu a sawi.
India batsman Kohli chuan, "Vawikhat chet ṭhat tawh chuan mipui min beiseina hi a sang
ṭhin khawp mai, chu beiseina tihlawhtling tur chuan theihtawp kan chhuah ang," a ti.