England an mualpho nawn

ICC World Cup-ah England an che nawi chhunzawm zel. An match hmasa berah World Cup thlengtu pakhat zawk Australia-in an sawp a, Zirtawpnia match hnihnaah inelna thlengtu pakhat zawk New Zealand lakah an mualpho nawn

Westpac Trust Stadium, New Zealand-a inkhelah England an bat hmasa a, over 33.2-ah an vaiin an out a, an run siam zat chu 123 lek a ni. An run siam zat hi Australia an tum ṭuma Australia batsman Aaron Finch run siam 135 aiin a tlem zawk. England tana run siam hnem ber Joe Root chuan ball 70-a hmachhawnah run 46 a vawchhuak hram.

New Zealand tan run 123 umphak hi thil harsa a ni lo. Black Caps-te hian Over 12.2 an khelhin mi pahnih chiah an hloh a, run 125 an tlin nghal. New Zealand in wicket riatin hnehna an chang a, England an mualpho.

New Zealand captain Brendon McCullum hmuhnawm khawpin a khel a, ball 25 a hmachhawnah run 77 a vawchhuak. McCullum hian ball 18 a hmachhawnin run 50 a tlin der tawh a, World Cup chanchina half-century siam rang ber a ni.

New Zealand tan kum 26-a upa Tim Southee a che ṭha a, Southee hian run 33 chauh pein wicket sarih a la. Southee hi World cup match khata wicket sarih la thei palina a ni.