MSL-ah Mission Veng an chak hmasa ber
Samsung 3:16 Plan Solution Mizoram Super League chu Ningani zan khan khelh ṭan a ni a, inkhel hmasa berah Mission Veng Vikings-in Zarkawt Serpents 78-64 in an hneh.
Basketball vanga mipui pungkhawm an ṭhahnem a, Hawla Indoor Stadium an leng lo. MSL mipui an hlut nghal a, amaherawhchu power supply mumal loh vangin a hun takah inkhel ṭan theih a ni lo.
Boruak a sang
Inkhel entu mipui thawm ṭha tak hnuaiah Mission Veng Vikings lamin bul an ṭan ṭha a, Zarkawt Serpents-in boruak sang an zo meuh lo.
Mission Veng tan Model Veng tlangval Moses Zoremmawia a che ṭha a, Vikings captain hian points 15 leh rebound 12 a nei thei a. Ani bakah Chanmari tlangval tawnhriat nei ṭha Lalrempuia chu Mission Veng tan ṭangkai a, point 13 lai a hlawhchhuak.
Rinlawk ang ngeiin Tuikhuahtlang tlangval Lalrina Renthlei che vel a hmuhnawm a, points 13 a team tan hlawhchhuakin rebound pali leh assist pathum a nei bawk.
Zarkawt Serpents tan Hmingthanmawia te unau an che ṭha a, Serpents captain Hminga hian point 18 hlawhchhuakin rebound vawi ruk a nei a, Hminga phirpui Lalremruata'n point 12 hlawhchhuakin rebound 10 a nei bawk.
Champhai tlangval te chetṭhat zarah Zarkawt Serpents lam hian 4th Quarter-ah Mission Veng Vikings hi an pawt thla teuh viau a, amaherawhchu Vikings an chet fuh chhunzawm a; Mission Veng an chungnung tluan a, 78-64 in hnehna an chang.
Hmabak a tam
MSL inkhel hmasa berah mipui an ṭhahnem a, Hawla Indoor Stadium a len thu dawn loh avangin mipui tam belh vak theih a ni tawh lo. Amaehrawhchu player-te erawhin hmasawnna tur an la ngah hle.
Basketball club level-ah MSL ang a boruak sang a la awm loh avangin player-te'n pressure hnuaiah an thiamna ang an la phochhuak thei lo a, an fitness a la ṭha tawk lo.
Player tawnhriat nei danglamna lang bawk mah se inkhel a la hmuhnawm tawk lo a, kan khaw tualah tun aia basketball hmuhnawm zawk hi la chhawp chhuah theih a ni.
Mipui an hlim
Mizo ṭhalaite'n intihhlimna leh ṭhianho a inkawmhlimna tur hmun an nei tam lo. Zonet leh MBBA-in Mizo ṭhalai rilrem zawng takin Mizoram Super League an rawn chhawpchhuak a, MSL hmangin mipui an hlim. Chhungkuaa kalna tlak a nih zel theih nan organiser-te'n rim zawka an thawh zel a ngai dawn a ni.
Eng nge an sawi?
Mission Veng Vikings secretary H.Lalhruaitluanga chuan, "Serpents kha team ṭha tak an ni tih hre sa chunga khel kan ni. Mahse, kan inbuatsaihna leh kan team chhung thawhhona te a ṭhat avangin hneh ngei tura inngai kan ni a, kan beisei ang ngeia kan match hmasa bera kan chak thei hi kan lawm hle," a ti.
Hruaia chuan beisei phak baka Mission Veng mipui in an ṭawiawm ṭhat avang leh, club T-shirt ha chunga fan ten Home fans ṭhutna zawng zawng an hnawhkhah avangin vengchhung mipui te hnenah lawmthu a sawi bawk.
Zarkawt Serpents president PB Lalsiamliana chuan, "Boruak a san avangin rin aiin kan player-te'n boruak sang an ngam lo. Kan zam vangin bul kan ṭan ṭha lo. 3rd quarter vel aṭang chuan zia chho tawh mah ila a tir lama kan khelh ṭhat loh kan tuar a, kan chak zo ta lo a ni," a ti.
Masiama chuan an sawi chhunzawmin, "Game hmasa bera chak nghal chu chak viau mah ila kan chak zo ta si lo a, a leh pek aṭang chuan kan dang tawh ang. Inzirna tur kan ngah a, a lehpekah chuan kan player-te'n zam loin ṭha zawkin an khel tawh ang," tiin an insiamṭhat tur thu a sawi a. Serpents president hian mipui ṭawiawmna ṭhat vanga a lawmthu Vanglai palai a hrilh bawk.