SC Paderborn khelmualah Bayern Munich

Zanin dar 8:00 hian Bundesliga hmahruaitu Bayern Munich leh Paderborn te Benteler Arena-ah an inkhel dawn. Nikum September thla khan Bayern hian kai thar Paderborn hi 4-0 in an an hneh tawh.

Point 52 hmu tawh Bayern leh pasarihnaa awm Paderborn hi an dinhmun a inthlau hle a, an inkarah point 29 zet a awm.

Bayern hi an game hnuhnungah khel ṭha em em mah se hma sawn zel an duh thu Sporting director Matthias Sam­mer chuan a sawi.

Sporting director Sammer chuan, "Kan game hnuhnungah khan Hamburger kha 8-0 in kan hneh a, kan khel ṭha hle. Mahse hmasawn zel kan duh a, a hma aia ṭhain kan la khel thei a ni. League hmahruaitu ni rih mah ila inthlahdah thei kan la ni lo, hmabak tam tak hlen tur kan la nei. Hma kan sawn zel loh chuan team dangin min rawn umpha mai dawn a ni," tiin a sawi.

Bayern hian an League game hnuhnung berah goal riat ngawt an khung a, Arjen Robben, Thomas Muller leh Mario Gotze ten goal hnih ṭheuh an khung. Amaherawhchu German champion hi Champions League-ah Shakhtar Donetsk-in 1-1 in an draw a, Paderborn tan fuihna ṭha tak a ni ngei ang.

Kum 1984 khan Bayern hian Kickers Offenbach chu 9-0 in an lo sawp tawh a, hemi hnua an chak chian leh ber ṭum chu kar hmasaa Hamburger 8-0 an sawp ṭum kha a ni.