Penalty sawi zui hlawh hmangin Liverpool chak

Anfield-ah Liverpool-in minute 85-naa Mario Balotelli penalty hmangin Besiktas an hneh a, penalty hmuh dan ni loin a pet tur thlan danin sawi zui a hlawh hle.

Ningani zan khan Europa League last 32-ah Liverpool-in an mualah Turkish club 1-0 in hneh a, February 26 hian Ataturk Olympic Stadium-ah second leg khelh leh tur a ni.

Inkhelh hma chanchin

Liverpool hian November 2007 khan Besiktas hi Anfield-ah an lo mikhual tawh a, 8-0 in an sawp. Tun ṭumah hian captain Steven Gerrard chu inhliam vangin a inlan thei lo a, a aiah Jordan Henderson chuan captain armband hreng a; Balotelli leh Raheem Sterling te bench-ah an ṭhu thung.

Besiktas hi tun season-ah English club lakah an che chhe lo a, Champions League qualifier-ah 1-0 chauhin Arsenal an hneh lo. Europa League group stage-ah Tottenham chu Istanbul-ah 1-0 in an hneh a, White Hart Lane-ah 1-1 in an inhnehtawk. An player pawimawh chu season liamtaa Liverpool kut aṭanga nomawi chhuhsaktu Chelsea player hlui Demba Ba a ni.

Ball an pet e

Liverpool-in striker inhliam vanga Champions League khel thei lo Daniel Sturridge-a'n tun season-ah a vawi khatna atan Europe inelnaah a inlan a, rawlthar Jordon Ibe a inlan bawk.

Liverpool-in bul an ṭan ṭha zawk a, Sturridge-a'n goal a khung teuh nghal hle. Dar chanve hnuah Turkish league joint top scorer ni mek Ba-a'n ṭha takin goal-ah pet mah se keeper Simon Mignolet-a'n a dang sak.

Second half ṭan hnu lawkah Henderson-a cross chu keeper Cenk Gonen-a'n a man fuh tawk lo vangin Adam Lallana-a'n chance ṭha a nei a, Southampton player hlui hian goal zawnah a pet lo.

Liverpool-in chak ngei tumin Sterling leh Balotelli an luh tir a, inkhel thlak danglamtu erawh kum 19-a upa Ibe a ni. English rawlthar hian Ramon Motta lak aṭangin penalty a hlawhchhuak a, a pet turah Liverpool an buai.

Balotelli-a'n captain Hender­son leh Sturridge nena inhnial hnuah a pet thei hram a, Italian forward hian chakna goal a khung zui bawk. Milan forward hlui hian a career-ah penalty ṭum 29 pet tawhin vawi 27 a pet lut.

An sawi zui ta

Inhliam vanga khel lo Liver­pool captain Gerrard chuan, "Jordan khan penalty a pet mai tur a ni. Dan chu dan a ni. Mario hi chu a chimawm hret ṭhin a ni. Goal a khung avangin Mario ka lawmpui a, amaherawhchu player inhnial hmuh a nuam lo," tiin ITV a hrilh.

Gerrard chuan sawi chhun­zawmin, "Mario-a'n goal khung a duh tih a hriat khan Jordan kha a hun takah a kal sawn a. Inkhelh bana interview-naah pawh a talbuai lo. Jordan kha captain a ni a, Mario khan a zah tawk lo a ni," tiin amah aia captain Jordan Henderson a fak.

Henderson chuan, "Penalty kha ka pet duh a, chutihrualin Mario khan inrintawkna a nei a, hun pawimawhah a lo pet goal fo tawh avangin a pet ta a ni," tiin a lungawi loh thu a sawi lo.

Buaina karah Balotelli a buai ve lo. Italian forward chuan, "Hendo penalty min pet tir avangin ka lawm e. Lemchan khawvel chhuahsan ula, kan chak kha a pawimawh ber," tiin penalty pet tur chungchanga buaina kalsan a hun thu a sawi.

Liverpool legend Jamie Carragher chuan, "Sturridge khan a pet mai turah ka ngai a, chutihrualin Gerrard awm loh vangin field chhunga penalty pet thiam berin a pet thoin ka hria. Balotelli penalty pet thiam zia hi Man City aṭangin kan lo hmu tawh," tiin a sawi.

Liverpool manager Brendan Rodgers chuan, "Kan chak kha a pawimawh ber chu a ni. Steven awm lo mah se penalty pet thiam tak tak kan kawl a, Jordan, Mario, Rickie Lambert leh midangte kha pet thei vek an ni. Kan rilru put hmang a dik a, kan chakna chhan pawh a ni," tiin penalty chungchang a sawi zui ṭha duh lo.