Nomawi nena bul ṭan kan tum - Aizawl FC coach

GIG Motors I Day Football-ah Aizawl FC-in vawiin chawhma dar 11:00 hian Chawnpui FC chu 1st MAP Ground, Armed Vengah an hmachhawn dawn. MPL11 round hmasa berah team pahnih hi 1-1 in an inhnehtawk a, I League club hi chak chiang tura ngaih a thiang lo.

Chutihrualin AFC hian Chawnpui nena an inhnehtawk hnuah Samuel Lalmuanpuia, Sawma Tlangte, Laltlanzova leh Peter Lalrinhlua te an la lut leh tawh a, chak ngei an tum ang.

Champion tum AFC

I Day Football hi kum 1982 aṭanga khelh ṭan tawh a ni a, tualchhung football inelna ngaihhlut ber zinga mi a ni. Aizawl FC hian kum 1988 leh 1996 khan PWD leh Republic Veng hnehin champion nomawi an chawi tawh.

Tun hnuah Aizawl FC din thar leh a ni a, MPL awm hnuah AFC hian kum 2015 leh 2016 khan kum zawnin nomawi an chawi. Mahse, kum sarih chhung nomawi an chawi tawh lo a, kuminah champion ngei an tum.

Aizawl FC coach Victor Lalbiakmawia chuan, "Nikum final-ah 2-0 a hma kan hruai hnuin Chhinga Veng lakah kan vanduai. Kuminah erawh nomawi chawi theih hmasak ber chawi hi kan duh a, nomawi nena bul ṭan kan tum," tiin Vanglaini a hrilh.

I League club hian champion thei tur squad an nei a, I Day Football-ah player an siksawi deuh a nih pawhin thil mak a ni lo ang. Mahse, Victor chuan, "Point thum hlawh chhuak thei turin player kan inrem ang," tiin player ṭha a luhtir tur thu a sawi.

Aizawl FC tan Lalbiakdika a khel ṭha a, Champhai Zotlang tlangval hian goal nga a khung tawh. BD-a hian goal a khung theih bakah a ṭhiante goal khung tur a siam thiam a, an awltir a rinawm loh. Chutihrualin BD-a hi awl ta pawh ni se; Zozoa, Sawma Tlangte leh goal nga khung tawh tho Augustine Lalrochana te an awm a, I League club tan buaina tur a awm lo.

AFC ngamtu Sawmtea

Chawnpui FC squad-ah player 30 chuang an awm a, I Day Football hi player en chhin nan hman an tum. Coach B. Malsawmzuala chuan, "Player hrechiang tur chuan competitive match-a an khel kan hmuh a ngai a, I Day Football-ah kan chhawr tam loh player-te chance kan pe dawn," tiin Vanglaini a hrilh.

Chutihrualin Chawnpui hian tih mai mai an tum lo a, Aizawl FC coach hlui Sawmtea chuan, "Aizawl FC chu rilru hian a ngam hrim hrim a, ka ṭang viau ang. An player-te ka hrechiang a, result ṭha neih ngei kan tum," tiin a sawi.

Chawnpui leh Aizawl FC inkhelhna tur hi 1st Bn MAP Ground a ni a, RG Stadium aiin a te zawk. Hei vang hian Sawmtea hote tan goal venhim a awl hret tura ngaih a ni. Aizawl FC winger-te tan hmun awl a tlem dawn a, inkhel a hmuhnawm phah turah a ngaih theih ang.