FC-a'n bul a ṭan nghal dawn - Police coach

Vawiin chawhnu dar 2:00 hian 1st Bn MAP Ground-ah Mizoram Police chuan I Day Football-ah FC Bethlehem an hmachhawn dawn a, 2022 I Day Football champion hian point thum hlawhchhuah nghal an tum.

Mizoram Police hi MPL11-ah beisei an pha lo a, match nga an khelh tawhah vawi hnih chiah an chak a, goal 10 an chhuah tawh. Police-in Santosh Trophy hnuhnung bera Mizoram defender pawimawh FC Lalhmunmawia an la lut a, Dinthar Sairang tlangval hian I Day Football-ah bul a ṭan nghal dawn.

Police oach Lalbiaksanga Colney chuan, "FC-a kan chang thei hi kan lawm a, bul a ṭan nghal ang. Kan group awmna hi a harsa zawk a, chuvangin kan fimkhur a ngai. FC Bethlehem kan hneh hi semifinal luh nan a pawimawh," tiin Vanglaini a hrilh.

Bengaluru FC academy aṭanga inzir chhuak FC-a hi season liam ta khan Chhinga Veng tan a khel a, MPL10 best defender nominee-ah a tel. Santosh Trophy qualifying round-ah Police defender Lalhmunmawia (Ahmuntea) leh Chanmari captain Lalrinchhana Tochhawng te an awm avangin khelhna hmun a chang lo.

Final round-ah erawh FC-a hian Rinchhana luah lanin Ahmuntea nen an inkawp a, Police tlarhnungah Santosh Trophy hnuhnung bera Mizoram defender rinrawl pahnih an awm dawn avangin tlarhnung a phui sawt a rinawm.

Police tlarhnung hi FC Bethlehem-in an fiah dawn a, MPL11-ah goal nga chauh an la khung avangin Police tan fiahna hautak tia sawi tur niin a lang lo. Chutihrualin Police hian an match hnuhnung bera Aizawl FC an hmachhawn ṭumin goal li ngawt an chhuah a, Bethlehemin an hlau bik lo ang.