Chelsea-in keeper Jorgensen an la lut
Chelsea-in Villarreal aṭangin goalkeeper Filip Jorgensen chu pound maktaduai 20.7-in an la lut a, kum sarih daih contract an ziahpui.
Kum 22 mi Jorgensen hi season liam ta khan Villarreal tan rinrawl a ni ṭan a, Yellow Submarine tan match 37 a khel. Stamford Bridge-ah Danish keeper hian Robert Sanchez nen number 1 nih an inchuh ang.
Jorgensen chuan, "Ka duhthusam a thleng dik. Khawvela club lian ber zinga mi Chelsea tana contract ka ziak hi ka lawm. Club thar tan bul ṭan hun ka nghakhlel a, ka teammate tharte nena khelh ho ka châk tawh khawp mai," tiin a sawi.
Chelsea keeper thar Jorgensen hi Sweden a piang a ni a, a naupan lai chuan Sweden tan age level-ah khel mah se a pa te ram Denmark tana khelh a thlang. Jorgensen hian Denmark Under 21 tan match ruk a khel tawh a, senior team tan a la inlan lo.
Jorgensen hi GIF Nike-ah bul ṭanin Sweden club ṭha Malmo FF-ah a inchher hriam a, Spanish club Mallorca zawmin heta ṭang hian Villarreal a pan.
Yellow Submarine a zawm hian kum 15 mi chauh a la ni a, B Team tana khel phawtin January 2023 khan senior team tan a khel ṭan. Jorgensen hian Chelsea pre season hmanna United States a pan nghal.
Blues hian friendly match pathum kheh tur an la nei a; Club America, Manchester City leh Real Madrid te an hmachhawn dawn a, Jorgensen hi match engemaw berah inlan tura beisei a ni. August 18, Pathianni zanah champion lai Manchester City nen Premier League-ah an inkhel dawn a, Enzo Maresca kaihhruaina hnuaia competitive match hmasa ber a ni ang.