Last 16-ah Sindhu leh Sen-a an lut

India chhuanvawr PV Sindhu-i leh Lakshya Sen-a te chuan Paris Olympic 2024 neih laiah last 16 an inhlangkai ta, a zawna a vawi thum nan Olympic medal hlawh chhuah ngei a tum ruh hle.

Nimin chawhnu lam khan Porte de La Chapelle Arena-ah Sindhu hi a inlan - Group M lama a khingpui Kristin Kuuba lakah harsatna a tawk lo, Estonia nula hi 21-5, 21-10 in in a hneh.

Sindhu hian a match hmasa zawkah Maldives mi Fathimath Nabaaha Abdul Razzaq chu 21-9, 21-6 in a lo hneh tawh bawk, last 16-ah chuan He Bing Jiao a hmachhawn leh ang.

Vawiin chhun dar 12:00 aṭangin badminton inelna hi neih chhunzawm a ni dawn, world number 1 hlui Sindhu hi a inlan leh nghal dawn, a khingpui tur Chinese nula te hi Tokyo Games-ah khan bronze medal inchuhin an lo intawng tawh bawk.

Hmeichhe singles player Sindhu bakah hian - men’s doubles pair Satwiksairaj Rankireddy leh Chirag Shetty te chuan knockout stage an lut tawh a, anni pahnih hi tun dinhmunah chuan khawvela a ṭha berte zinga mi an nih phak avangin medal lak an beisei ngam.

Nimin tlai mipa singles inkhelah Lakshya Sen chuan Indonesia shuttler Jonatan Christie chu 21-18, 21-12 in a hneh a, game hmasa zawkah 0-5 ngawtin hniam nghal mah se ropui taka tho chhuakin a chak leh ta zawk a ni.

Group match dangah HS Prannoy a inlan ve dawn bawk a, a chak a nih chuan last 16-ah Indian tlangval pahnih hi an inhmachhawn thei dawn a ni.