Olympic football a 'hot' chho; Argentina leh France an intawng dawn

Paris khawpuiin Olympic a thleng a, infiammi sing chuangin infiamna 32-ah inelna an hmachhawn a, mimal inelna hmuhnawm tak tak karah football inelna chu ngaihven hlawh pawl a ni - a hmuhnawm takzet.

Olympic football hi Under-23 inelna a ni a, squad tinah player 18 awm tur a ni. Player 15 chu January 1, 2001 hnu lama piang an ni tur a ni a, a bak pathum chu hei aia upa an nih erawh phalsak a ni thung.

Player 18 zinga pahnih chu goalkeeper an nih a ngai a, player 18 bakah hian player pali chu thlan theih tura dah an ni - anni hi squad takah awm loin, player inhnukdawk emaw inhliam emaw an awma thlakna tur an ni.

Team 16-in inelna hi hmachhawnin, group paliah team pali zel awmin ṭhen hran a ni . Group tina a sang pahnih ṭheuhte chu quarterfinal-ah an lut nghal a, group stage hi khelh zawh ni tawhin quarterfinal-a inkhel tur a chiang tawh.

A hot nghal

Group Stage-a inkhelah boruak 'hot' tak tak a awm nghal - chung zingah chuan Argentina leh Morocco inkhel kha a tel. Morocco-in 2-0 a hma an hruai hnuin Argentina hian si phurh an sut zo a, an goal hnuhnung zawk hi hun pek belha Cristian Medina khung a ni.

Morocco fan-te lungawi loin nasa takin khelmualah thil an vawm lut a, an tlan lut bawk. Inkhelh chhunzawm theih a nih loh avangin chawlh lailawk a ni a, fan-te stadium aṭanga chhuahtir vek an nih hnuah team pahnih hi an inhmachhawn ṭha leh!

Mahse, minute thum khel leh mah se, Argentina goal khung dan chu video assistant referee (VAR) hmanga ennawn zui niin, Argentine goal khung hi an pawm lo zui - Morocco an chak a, an ram legend Lionel Messi meuh pawh lungawi loin social media-ah a ṭawng chhuak.

Mahse, a tawpah chuan Argentina-in an hmabak match hniha hnehna an chan avangin quarterfinal an lut ta tho a, group stage match zawng zawnga chak vek France nen an intawng dawn - hei hi a 'hot' loh ring suh!

Asia lam hawiin

Olympic football-a team tel tur hi a khawmualpui a zirin inelnaa tel tur an thlan dan a inang lo - France hi inelna thlengtu an nih vanga tling chiang an ni a, North America, Europe, Asia leh Africa te chuan age level tournament an neih sa chu Olympic khel tur thlan nan an hmang.

Hetihlai hian Asia leh Africa playoff hmangin hmun ruak pakhat chinfel a ni a, Oceania leh South America ten Olympic tel tur zawn nan qualifier tournament hranpa an khel thung. Asia aṭang chuan Japan, Uzbekistan leh Iraq an tling.

Asia aiawha inlan zingah, Tokyo 2020-a semifinal thleng thei Japan chuan group stage match-ah hnehna chang vek chungin quarterfinal an lut a, Paraguay, Mali leh Israel te lakah goal riat khungin, an lamah goal khat chiah a lut.

Japan hi AFC U23 Asian Cup 2024 champion nih vanga Olympic khel an ni a, pahnihna Uzbekistan-in match thum aṭanga point khat chiah hmuin an tla a, Asian Cup U23 pathumna Iraq-in match thum an khelh aṭanga point thum hmuin, quarterfinal tlin nan a tawk lo.

Hello Spain

Euro 2024 khelh zawh takah an champion avangin Spain chanchinin ngaihven a hlawh a, Olympic-a Spain U23 pawhin an senior team-te hnathawh avangin ngaihven an hlawh sawt - quarterfinal an lut.

Mahse, Spain hian match hmasa pahnihah Uzbekistan (2-1) leh Dominican Republic (3-1) an hneh hnuin Egypt (2-1) an ngam lo a, quarterfinal-ah group stage match-a chak vek thei Japan an hmachhawn dawn avangin insiamṭhat an mamawh.

Morocco-in match hmasa berah sawisel hlawh takin Argentina an hneh a, Ukraine an ngam lo zui. Mahse, Iraq lakah 3-0 a chakin an insiamṭha zui a, quarterfinal an lut leh ta tho - quarterfinal-ah USA an hmachhawn dawn.

World Cup 2026 thleng tur USA tan Olympic-a player naupang rual chet ṭhat hi an World Cup thlen tur atana result lawmawm a ni dawn a, anni hian group stage match thum aṭanga point ruk hmuin, quarterfinal hi an lut.

Argentina vs France!

World Cup 2022 final-ah Argentina-in France hnehin nomawi an chawi a, he Argentina team hian an duhtawk mai lo - Copa America 2024 nomawi chawi zuiin, champion an lawmnaah France tihelna hla an sa zui!

Mi tam takin Argentina chet dan hi vun rawng inhmuhsitnaah an ngai a, thawm an nei na hle. A bik takin Chelsea midfielder Enzo Fernandez-a'n dem a hlawh lehzual a, he thil thleng hian ram pahnih inkar boruak a ti 'hot' sawt.

Chutiang a nih lai tak chuan Olympic quarterfinal lamah team pahnih an intum dawn! Under-23 inelna ni mah se, en a châkawmna a nep phah lo a, France-a inhmachhawn tur an nih leh zel avangin a hmuhnawm khawp ang.

August 2, zan dar 12:30-ah France leh Argentina ten Olympic quarterfinal hi an khel dawn a, football khawvel chuan Stade de Bordeaux, Bordeaux-a team pahnih inkhel tur hi thlirin an mit an len dawn.