Olympic football-ah tute nge player langsar?

Olympic mipa football hi Under-23 inelna ni mah se, team tinin senior player pathum an kawl thei a, ram tam takin an player langsar tak tak an hruai nual - tin, ram ṭhenkhat chuan kum 23 hnuai lam player langsar an nei sa hrim hrim bawk.

Thierry Henry enkawl France-in kum 33 mi Alexandre Lacazette chu captain armband hren tirin an hruai a, Sevilla centre back Loïc Badé leh Crystal Palace forward Jean-Philippe Mateta an hruai tel bawk.

Mahse, Les Bleus tana langsar ber erawh Michael Olise a ni a, Crystal Palace aṭanga Bayern Munich zawm hlim winger hi kum 22 mi a ni. Match thum an khelhah goal khat khungin, assist vawi khat a nei tawh.

Guinea-in Liverpool midfielder hlui Naby Keïta captain-na hnuaiah inkhel hmachhawn mah se, quarterfinal an thleng zo lo a, Argentina hi an captain chu ram tana vawi 117 inlan thei Nicolás Otamendi a ni - kum 36 mi a ni ve tawh.

Argentina tan hian Manchester City striker Julian Alvarez a inlan bawk a, goalkeeper Gerónimo Rulli chu Ajax keeper ni lai a ni. Egypt tan Arsenal midfielder chhuak ta Mohamed Elneny chu captain a ni a, season tharah UAE Pro League club Al Jazira Club tan a khel dawn.

Spain bawk hian player langsar chu an kawl hnem - kum 24 mi forward Abel Ruiz chu captain niin, ani hi Girona player thar a ni a, ani bakah hian Villarreal midfielder Álex Baena leh Barcelona forward Fermín Lopez te an ni nawk.

Japan-in player langsar vut sawi tur nei lo mah se, kum 23 chung lam player engzatmah hruai lo chunga Olympic hmachhawn ngam ngat an ni - he team hi an ṭha rualin, an kum a naupang tlang a, captain Joel Chima Fujita pawh kum 22 mi chauh a la ni.