Atletico-in Gallagher an duh

Spanish club Atletico Madrid-in inthuam chak hna an thawk zel a, tun hnaiah Chelsea midfielder Conor Gallagher chu lakluh tumin an hel leh ta - Blues nen hian an indawr tawh.

Kum 24 mi midfielder hi Euro 2024 a khelh chauh avangin chawlh a la hmang mek a, club pahnih indawr tawh mah se, a mimal thilah Atletico hi inremna a la neihpui lo.

Gallagher hian London club hi chhuahsan a duh kher ang em, tih chu zawhna awm a ni a, chutihrual chuan Stamford Bridge-ah kum khat chiah contract a neih tawh avangin Blues zawk hian hralh an pawi ti lo nia sawi a ni.

English midfielder hi Blues hian contract thar chungchangah inbiakna an lo neihpui tawh nia sawi a ni a, mahse, Blues-in an dawrna zat hi Gallagher chelh nan a tling dawn em, a hriat loh.

Kum ruk mi lek a nih laia Chelsea zawmtu Gallagher hi season hmasa nipui transfer lai khan Tottenham Hotspur leh West Ham te chuan an lo dawr tawh a, mahse, tunah erawh Premier League club ngaihventu a nei lo nia sawi a ni.

England tan vawi 18 inlan tawh Gallagher hian season hman zawh takah khan Chelsea tan inelna hrang hrangah match 50 a khel tling a, goal sarih khungin assist vawi kua a nei tawh.

Chelsea manager Enzo Maresca chuan Gallagher chungchang hi sawiin, "Transfer lai a nih miau avangin engpawh a thleng thei. Mahse, Conor chungchangah chauh a ni lo a, kan player-te hi che thei vek an ni," a ti.

Blues hian tun nipuiah Atletico Madrid striker Samu Omorodion chu lakluh tumin Spanish club hi an lo dawr tawh a, mahse, an dawrna hi hnawl a ni. Omorodion hi Olympic-ah ram tan a fehchhuah mek avangin thil dang ngaihtuah a duh rih lo a ni.