Williams zawm tur Sainz

Ferrari driver Carlos Sainz chuan season thar aṭangin team dang a zawm dawn - Formula 1 huanga an elpui zinga mi Williams a zawm dawn a, a contract rei zawng hi ziah lan ni lo mah se kum khat aia rei tih a ni thung.

Kum 29 mi Sainz hian season tharah chuan Ferrari tan hmun a chang dawn lo, world champion vawi sarih ni tawh Lewis Hamilton an lak avangin atan team dang zawn a ngai.

Sainz hian team zawm tur a haihchham bik lo - Williams bakah hian Alpine leh Sauber te chuan an ngaihven, anni pahnih hian kum 2026 aṭang chuan Audi an thawhpui dawn, hmabak eng tak an nei niin a lang.

Chona thar hmachhawn tur Sainz chuan, "Williams ropuina ang kha nei let leh tura beih kan tum dawn a, chona hautak leh phurawm tak pawh a ni ngei ang, chumi tur chuan kei pawh ka inbuatsaih dawn a ni," a ti.

Car intlansiakna sang ber season kal laiah Sainz hian point 162 hmuin pangana a ni mek a, champion beisei ngam chiah tawh lo mah se a ti ṭha zinga mi a ni phak - season thara amah nek chhuaktu Hamilton chungah a awm mek.

Formula 1 hian season chawlh an hmang mek - August thla tawp lamah hian Dutch Grand Prix an tlan leh ang.