Zverev chak laiin Paolini a tla

Olympic champion Alexander Zverev chuan a gold medal humhim ngei a tum a, kawng dik a zawh chho zel - German tlangval hian Czech Republic mi Tomas Machac chu 6-3, 7-5 a hnehin third round a lut.

Paris khawpuiah khua a lum hle - Thawhlehni zan Zverev te inkhelh lai pawh hian 30c a tling a, tennis khelh laklawh lai hian player in khaw lum vanga harsatna a tawk a nih chuan minute 10 chhung a chawlh lailawk phalsak an ni hial.

Kum 27 mi Zverez chuan, "Tui in tur kan dawng a, mahse dahna tur a awm ṭhat tawk loh avangin ka tui in tur chu a lo lum leh pup mai ṭhin a, chu chuan harsatna min siamsak chang a awm," tiin a sawi.

Hmeichhe singles lamah Germany aiawhtu Angelique Kerber pawh a la chak zel - Rio Games silver medalist hian Paris Olympic zawh hian tennis chawlhsan a tum. Ram tana a inlan tawpna turah hian Canada aiawhtu Leylah Fernandez chu 6-4, 6-3 a hnehin quarterfinal a lut.

Ngaihven hlawh zinga mi Coco Gauff erawh a chak lo - American nula hi Croatia nula Donna Vekic lakah 7-6(7), 6-2 a chak loin third round-ah a zinkawng a tawp, a tlak danah a lawm lo tih a sawi zui bawk.

Kum 20 mi Gauff hian set hnihna an khelh laiin buaina a nei, ball vuak out leh out lo chungchangah umpire nen an inhnial a, rei deuh tak an sawi dun hnuah pawh ngaihdan an inthlaksak thei lo.

Philippe Chatrier Court-a inkhel entu ten Gauff an ṭan viau a, mahse mipui puihna dawng ṭha viau mah se Vekic a zam duh bik miah lo, set khatnaah a hniam zawk hnuin a to chhuak a, set hnihnaah phei chuan game hnih chiah hloh chungin a chak.