Chanmari leh Ramhlun Athletic an chak

GIG Motors I Day Football chu nimin aṭangin RG Stadium-ah khelh ṭan a ni a, champion rinkai Chanmari FC-in SYS FC 'kim lo' 2-1 in an hneh hram. Inkhel dangah Ramhlun Athletic-in ADFA First Division club Bethlehem Vengthlang 5-2 in an hneh thung.

Group A-ah Chanmari FC, SYS FC, Ramhlun Athletic, BVT FC bakah Sihphir Venghlun FC te an awm a, vawi khat ṭheuh an inkhelh kual hnuah a sang pahnihin semifinal an lut ang.

CFC tan Zirtea

SYS-in I Day Football-ah squad siksawiin MPL11-a player chhawr tam loh an luhtir a, Chanmariin an zuam sual. Chanmariin MS Dawngliana penalty hmangin minute 40-naah hma hruai mah se penalty hlawh chhuaktu Lalrokima chu minute 52-naah hnawh chhuah a ni.

SYS-in player 10-a khel Chanmari lakah C. Lalduhawma penalty hmangin si phurh an sut a, Lalsangzuala Hmar hoten tun season-a goal an chhuah hmasa ber a ni.

Lunglei club-in Chanmari lakah point hmuh beiseina nei hman mah se Lalnunzira'n minute 86-naah box pawn aṭangin kawh zetin a pet goal. Republic Veng tlangval Zirtea hi season liam ta khan I Day Football-ah Chhinga Veng a champion pui a, best player atan thlan a ni.

MPL club an ṭha

Ramhlun Athletic-in ADFA First Division club Bethlehem Vengthlang lakah MPL club danglamna an pholang. Ruahsur vangin inkhelh hun an sawn tlai hret a, inkhelh ṭan hnuah ruah chauh sur tawh loin goal a sur tel.

Ramhlun leh BVT inkhelah goal sarih a lut a, Ramhlun tan Richard Lalramnunpuia'n goal hnih a khung bakah Felix Lalruatsanga, Benjamin J. Lalrinliana leh Lalramdinsanga ten goal khat ṭheuh an khung.