Quarterfinal-ah Nadal leh Alcaraz

Rafael Nadal leh Carlos Alcaraz te chuan Olympic men’s tennis doubles huangah quarterfinal an lut, gold medal hlawh chhuak tur chuan match pathum dangah an chak leh phawt a la ngai dawn tihna a ni.

Spain aiawhtu Nadal leh Alcaraz te hian Netherlands tlangval pahnih Tallon Griekspoor leh Wesley Koolhof te ṭangdun chu 6-4, 6-7, 10-2 in an hneh a, inkhel inhnehtawk leh hmuhnawm takah an vannei ta zawk.

Grand Slam vawi 22 champion tawh Nadal hi singles lamah Novak Djokovic hneh loin a tla hlim a ni a, a hun hnuhnung lamah an ram tan medal hlawhchhuah theihna remchang an neih chu doubles chauh hi a ni tawh.

Alcaraz erawh doubles bakah singles lamah a la dam - tun season chhunga French Open leh Wimbledon champion tawh hi rinkai berte zinga mi a ni mek a, ani hian a vawi khat nan Olympic medal a beisei ve thung a ni.

Mipa doubles huangah hian Andy Murray leh Dan Evans te pawh an la chak ve zel a, world number 1 hlui Murray hi Paris Olympic zawh ruala chawl tur niin, a chawlh hun tur a la pawtsei rih tihna a ni.

Great Britain tlangval pahnih Murray leh Evans te ṭangdun hian Belgian mi Sander Gille leh Joran Vliegen te inkawp chu 6-3, 6-7(8), 11-9 a hnehin quarterfinal an inhlangkai ve bawk.