Nistelrooy-a'n Chido Obi a hmin

Manchester United chuan Arsenal youth team-a an goal khung khawl Chidozie Obi-Martin an lalut dawn a, Danish striker an hmin theih nan Ruud van Nistelrooy a pawimawh.

Kum 16 mi Obi hi Glostrup, Denmark-ah a piang a, tualchhung club Kjobenhavns Boldklub aṭanga a inzir hnuah kum 2022 khan kum 14 mi niin Arsenal a zawm. Gunners tan hming a chher a, Under 18 tana a khelh hmasak berah Southampton 4-0 in an hneh a, hattrick a siam.

Nikum November thla khan Mikel Arteta chuan senior team zinga training turin a ko hial. November 18, 2023-ah Arsenal Under 16-in Liverpool Under 16 14-3 in an sawp a, Obi-a'n goal 10 a khung. Hemi hnu hian Under 18 inelnaah Norwich City an hneh ṭumin goal sarih a khung a, Gunners U18 tan match sarih lekah goal 24 a khung.

July 30, 2024 khan Obi hian Arsenal a chhuahsan tur thu a sawi a, Europe club lian hoin an ngaihven nghal. Germany aṭangin sum tam zawka sawmna a dawng a, Gunners-in chelh tumin theihtawp an chhuah bawk. Mahse, Nistelrooy-a'n Obi hi hmai chhanah Man United hmachhawpte a hrilh hnuin Danish striker hian Old Trafford pan turin thutlukna a siam.