India tana medal latu Kusale

Swapnil Kusale chuan Paris Olympic 2024 neih laia mipa 50m rifle inkahsiakah pathumna dinhmun a luah - nimin chawhnu lama inelna neihah point 451.4 hmuin bronze medal hi a hlawh chhuak a ni.

India tlangval hian China tlangval Yukun Liu (463.6) leh Ukraine mi Serhiy Kulish (461.3) te a tluk lo, a sang ber dinhmun luah phak lo mah se a thlen chin hi India tan chanchin lawmawm a tling.

Olymic medal latu Kusale chuan, "India tana bronze medal la chu a hluin a lawmawm ngei mai. Tun hnai kum hnih vel chu ka che ṭha tawk lo a, chuvangin beiseina neih san pawh kha a harsa ve hle.

"Inelna kan han hmachhawn a, dawhthei leh fimkhur lutuka chet a ngai tih pawh ka hria. Chutihrualin tawnhriat ka lo neih ve tawhte chu a ṭangkai hle bawk," tiin a sawi a, pakhatna ni phak chiah lo mah se a thlen chinah a lungawi.

Paris Olympic bikah India chuan medal pathum a la ta chiah - Kusale hma hian Manu Bhaker chuan women’s 10m air pistol event-ah bronze a la tawh a, Bhaker-i leh Sarabjot Singh ten 10m air pistol mixed team event-ah medal an la bawk.

Khawvel huap infiamna khawmpui lianah hian, inelna chi khatah India hian medal lak tam a harsat ṭhin, tun ṭumah hian si lai kah huangah medal pathum a la ta a, infiamna chi khat huanga medal pahnih aia tam a lak vawi khatna a ni hial.

Silai kuah huanga India tana Olympic medal lo la tawh Abhinav Bindra chuan, "Swapnil Kusale hi mi taima leh thawkrim a ni a, a thawhrimna te chuan hlawhtlinna a thlen ta. Paris Olympic hi India tan a hlu chho hle, a bik takin shooting huangah kan chet ṭhat avangin kan tan chuan thil lawmawm bik a ni," tiin a sawi.

Kum 28 mi Swapnil Kusale hi Maharastra-a thingtlang khaw pakhat Kambalwadi aṭanga rawn chawr chhuak a ni a, tun hmain khawvel huap inelna dangah pawh India tan medal a lo la tawh - World Cup 2021 leh Asian Games 2022 champion a ni.