Nadal tan Paris Olympic a tawp
Rafael Nadal chuan Paris Olympic medal beiseina a nei thei ta lo - singles inelna lama a tlak hnuah doubles aṭangin an tla fel leh ta, a hun hnuhnungah an ram Spain tan medal a hlawh chhuak dawn lo tihna a ni.
Spanish tlangval pahnih Nadal leh Carlos Alcaraz ten men’s doubles quarterfinals an lut a, beiseina pawh an nei sang. Mahse, American duo Austin Krajicek leh Rajeev Ram te lakah 6-2, 6-4 in an chak lo.
French Open khelhna hmunpui ber Court Philippe Chatrier-ah Nadal te hian match an khel a, vawi 14 nomawi a chawi tawhna hmun a nih bakah, a ṭanpui Alcaraz-a'n hmanni lawka major title a lakna hmun a ni bawk.
Mipui lamin Nadal leh Alcaraz te hi ṭan viau mah se an che hleithei lo, an ṭum fuh loh ni a nih miau avangin set hnih an khelh chhungin a hnufual leh team ṭha lo zawk an ni.
Kum 38 mi Nadal hian a hma hun tur a la sawi chiang chiah lo a, chutihrualin Olympic bikah chuan a inlan hnuhnung ber a nih ngei a rinawm - hliam vanga a buai fo avangin atan ngaiawh leh a harsa tawh.
Beijing Olympic 2008-ah khan Nadal hian Spain tan gold medal a lo hlawh chhuak tawh a, kum 2016 khan Rio Games-ah doubles khelin an champion tawh bawk - kuminah erawh Novak Djokovic hneh loin a tla a, doubles aṭangin an tla zui leh bawk.
Nadal tla mah se a ṭanpui Alcaraz erawh singles lamah a la dam - Spanish star hian Russian mi, neutral athlete anga inlan Roman Safiullin chu 6-4, 6-2 in a hneh, chak turin darkar khat leh a chanve chauh hun a hmang.
French Open champion Alcaraz chuan, "Khua a lumin boruak a hnawng em em a, chutiang karah pawh ṭha taka ka khel thei kha ka lawm," a ti. Paris Olympic singles match bikah set a la hloh miah lo a, a match lehpekah American tlangval Tommy Paul a tum ang.