Goal khung thiam Ramhlun Athletic
MPL club thar Ramhlun Athletic-in I Day Football match hmasa berah ADFA First Division club Bethlehem Vengthlang 5-2 in an sawp. Danny Lalduhawma hote hian vawiin chawhnu dar 2:00 hian SYS FC an hmachhawn dawn a, goal lut tura ngaih a ni.
Ramhlun Athletic enkawltu Danny hi Mizo zinga AFC A Licence nei hmasa ber a ni a, a inkhelh hun laiin goal khung thei bik a ni bawk. Kum 2001 daih tawh khan Subroto Cup-ah Danny hian Mizoram a champion pui a, top scorer a nih avangin LML Adreno FX bike a dawng.
Goal khung thei Danny-a enkawl Ramhlun Athletic-in goal khung an thiam a, MPL11-ah pawh goal 11 khung tawhin Aizawl FC (goal 14) chauh an tluk lo. Ramhlun tan Felix Lalruatsanga leh Richard Lalramnunpuia te goal hmaah an hriam. Serchhip tlangval Felix hian MPL11-ah goal nga khung tawhin I Day Football-ah goal khat a khung.
Ramhlun tlarhmaa awm Richard hi tah hriam deuh a, Mizoram striker ni tlak a ni. Armed Veng South tlangval Richard hian thahrui a ngah a, a khelh dan hi out and out striker tiin a sawi theih. ADFA Second Division club Armed Veng aṭangin Ramhlun hi a zawm a, MPL11-ah goal khat chauh la khung mah se I Day Football-ah goal hnih a khung der tawh.
MPL-ah Ramhlun Athletic hian SYS hi 2-1 in an hneh a, Lunglei club-in an ṭhat dan berin I Day Football an hmachhawn lo bawk. Mahse, SYS kim lo hian Chanmari an chhaih buai thei a, an player-te hian pressure an neih loh avangin Ramhlun tan pawh buaina tham an ni ang.