Chanmari lakah tlawm nawn kan tum lo - Robert
I Day Football-ah Sihphir Venghlun chuan vawiin chawhma dar 11:00 hian Chanmari FC an hmachhawn dawn. MPL11-ah Chanmari hian Sihphir Venghlun hi 3-0 in an hneh a, coach Robert Laldinthara chuan Chanmarians laka tlawm nawn an tum loh thu a sawi.
Sihphir Venghlun hian kuminah a vawi khat nan MPL-ah an khel a, match nga khelh zawhah Mizoram Police point hmuh zat, point ruk an hmu thei. Coach Robert chuan, "I Day Football-ah MPL-a inlan tam lo player khelh tir kan tum a, squad kan siksawi hlawk dawn. Chutihrualin Chanmari lakah tlawm nawn kan tum lo ," tiin Vanglaini a hrilh.
Chanmari lakah Sihphir Venghlunin tlawm nawn duh lo mah se player an thlak hlawk chuan tlawm nawn thei dinhmunah an ding. Lalsangzuala Hmar kaihhruai Chanmari hi an squad a chhah ṭha a, position tinah a tlukpui thlakna tur an nei zel, a tih theih.
Chutihrualin Chanmari hi an match hmasa hmasa berah player thlak hlawk SYS an hmachhawn chungin an talbuai a, 2-1 in an chak hram. Sanga hote hi chak zawk tura ngaih ni mah se I Day Football vawi khat khelhna tur Sihphir Venghlun hian an barakhaih thei tlat.