Klopp-a'n England enkawl a tum lo
Liverpool boss hlui Jurgen Klopp chuan coach tur zawng mek England football team enkawl tumna a neih loh thu a sawi a, German coach hian chawlh hahdam rih a la thlang chhunzawm zel.
Kum 57 mi Klopp hian season zawh rual khan Liverpool a chhuahsan a, "Club enkawl chhunzawm turin thathona ka nei tawh lo a ni," a ti a, football khawvel aṭanga chawlh hahdam lawk a duh thu a sawi.
Mahse, heti chung hian coaching hnaruak langsarah chuan Klopp hming lam rik a ni zel - tun hnaiah ringawt pawh USA leh England nen sawizawm a ni a, Julian Nagelsmann awm reng chungin Germany nen sawizawm a ni bawk.
Wurzburg, Germany-a International Coaches' Congress an hmannaah Klopp hi inlanin, tun dinhmunah sawmna engmah a awm loh thu a sawi a, German coach chuan, "Eng hna mah zawrh ka ni rih lo - club emaw ram emaw, min dawrtu an awm lo," a ti!
A chi nang!
Klopp hian Liverpool-ah kum kua hun a hman chhungin Premier League, Champions League, FA Cup, League Cup (2), FIFA Club World Cup leh UEFA Super Cup nomawite a chawi a, a hmaa nomawi inchhawp chu a chawi kim vek.
Manchester City boss Pep Guardiola nena English football-a an inel chu football ngainatute titi a tling a, mit leh beng thlengin a tlai ṭhin hle. Mahse, Klopp-a'n coaching khawvela hun hman reng chu hahthlak a ti a, January khan Reds a chhuahsan tur thu a puang.
Klopp hian chauh tawngkhawng vanga chhuahsan a nih thu a sawi laiin Three Lions nen an sawizawm a, a ngaihdan a ni lo! Borussia Dortmund boss hlui ni bawk chuan, "England maw? Anni hi hrethiamin, enkawl bik ta ila, football chanchina thil zahthlak ber a ni dawn asin," a ti a, chauh vanga coaching chawlhsan lailawk thu sawi hnu lawka team enkawl a tum lo.
England enkawl tur hian Klopp bakah Newcastle United boss Eddie Howe, England Under-21 boss Lee Carsley, Chelsea leh Brighton & Hove Albion manager hlui Graham Potter leh Bayern Munich boss hlui Thomas Tuchel te hming pawh lam rik a ni a, Howe bik hian Magpies chhuahsan a tum loh thu a sawi tawh.
Kir leh mahna
Klopp hian a hmain coaching a chawlhsan tlang mai theih thu a lo sawi tawh a, tun ṭumah erawh a thluk a dang ta hret - German coach hian football coaching-a a kir dawn leh dawn loh a sawi lawk theih loh thu a sawi.
Dortmund a enkawl laia a zawna league nomawi lo chawi tawh coach chuan, "Tun dinhmunah chuan min dawrtu an awm lo a, thlate han liam zel se, eng angin nge hun kan hman zel ang kan la hria ang chu," a ti.
Klopp chuan sawi zawmin, "Tun dinhmunah chuan coach ka nihna anga ka hna chu hlen tawhah ka inngai a ni - inngaihtuah lung puam a, Liverpool kha chhuahsan thut ka ni lo a, uluk taka ngaihtuahna sen hnua thutlukna a ni," a ti a, tunah chuan chawlh hahdam a duh.
Player a nih laia striker leh defender-a khel kawp thei Klopp hian club pakhatah hun a hmang rei ṭhin hle. Kum 2001 khan Mainz 05 aṭangin a coaching career a ṭan a, Borussia Dortmund chu 2008-15 inkar enkawlin, Liverpool chu 2015-2024 inkar kha a enkawl bawk.
Sawi leh ila
Klopp hian a coaching career ṭanna Mainz 05-ah nomawi sawi tur nei lo mah se, 2003-04 season khan Bundesliga a kaipui a, budget nei tlem ber ni chungin table-ah 11-na an ni thei. Dortmund a enkawl laiin Bundesliga nomawi a zawnin a chawipui a, DFB-Pokal leh DFL-Supercup (2) a champion pui bawk.
October 2015 aṭanga Liverpol enkawl ṭanin, nomawi pasarih a chawipui. Best FIFA Men's Coach-a vawi hnih thlan tawh Klopp hi a vanduai tiin a sawi theih bawk - Dortmund-ah khan DFB-Pokal final vawi thum a hruai thlenah vawi khat chiah a chak a, Champions League 2013 final-ah an tlawm bawk a nih kha.
Liverpool-ah Champions League final vawi thum hruai thlengin vawi khat chiah an champion a, Europa League final-ah a tlawmpui a, League Cup final-ah vawi khat a tlawm bawk - Premier League-a point khata champion lohte pawh a nei!
Klopp chuan, "Khawvela club ṭha ber ber ka lo enkawl tawh a, coaching-a luh leh chu thla tamte han liam leh se, kan la sawi leh thei ang chu. Football-a hun hman a, mite ṭanpuitu nih hi chu ka la duh reng - kan hre zel ang chu," a ti a, a hma hun a la chiang lo.