Liverpool-in Arsenal an hneh

Arne Slot hnuaia indinthar hna thawk mek Liverpool-in pre-season tour-ah result duhawm an neih belh zel a, nimin khan friendly match-ah Arsenal chu 2-1 in an hneh.

Lincoln Financial Field-ah fans 69,679-in inkhel hi a hmunah thlirin, he stadium-a football en tura fans an punkhawm hnem ber ṭum record an siam - a tawpa lawm zawk chu Liverpool fans an ni.

Reds tan hian Mohamed Salah leh Fabio Carvalho te chuan goal khat ve ve khungin, Arsenal tana Kai Havertz goal khungin awmzia a nei phak lo. Reds hian August 4, Pathianni zingah Manchester United an hmachhawn ang a, USA-a an tour bik chu a zo ang.

Arsenal erawh US-a an tour chu a zo ta a, karleh lamah Bayer Leverkusen leh Lyon te nen Emirates Stadium-ah friendly match khel turin London lam panin an haw zui - Arsenal hian an US tour aṭanga zirchhuah an nei a nih chuan, striker an mamawh tih hi a ni ang.

Liverpool lakah Gabriel Jesus hi champion pui khawp striker a tling lo tih a lang nawn a, Brazilian striker hian Caoimhin Kelleher chiah a hmachhawn chungin a zawnah tak a pet a, Gabriel Martinelli, Havertz, Fabio Vieira leh Eddie Nketiah ten an chance neih an hlah vek bawk.

Arsenal manager Mikel Arteta chuan, "Chance kan neih chu kan chhawr tur a ni a, kan khingpui kan hrem thei tur a ni. Liverpool kha chuan an chance neih an rawn khung nghal mai a, chu chu team pahnih danglamna a ni.

"Goal khung theihna chance kan insiam a, hmasawn kan ngai a ni," a ti a, goal khung kawngah harhtharna chan an mamawh thu a pha lo. Gunners hian nipui transfer-ah striker an la lut thut a nih pawhin a mak lo ang.

Hetihlai hian Liverpool-in Slot-a hnuaia an game thar an khelh chhunzawm zel a, heavy metal football kalsanin, ball chan tam chu thupui berah an nei - beisei ang zan chuan an la khel chhuak lo a, Kelleher leh Curtis Jones-te tihsual chu a langsar lai a ni.

Mahse, Reds hian Slote-a hnuaia a system zir turin hun an la nei tam tawk lo a, an bel thuai tura ngaih a ni - US tour-ah match hnih khel tawhin, Real Betis (1-0) leh Arsenal (2-1) an hneh avangin an inringtawk khawp ang.

Liverpool lawmna tizual turin Arsenal lakah Harvey Elliott khel a hmuhnawm. Reds goal khung pahnih chu a siamsak ve ve a ni a, Diogo Jota tana a siamsak kha Portuguese forward hian khung ngat se, assist hattrick nei thei tur a ni.