Hliamin Manchester United a run

Manchester United defender thar Leny Yoro chu hliam vangin thla thum chhung a khel thei dawn lo a, striker Rasmus Hojlund pawh kar ruk chhung a chawlh a ngai. Player pawimawh pahnih hi pre season-a Arsenal an hneh loh ṭumin an inhliam.

July 28, Pathianni zing khan SoFi Stadium, California-ah Man United leh Arsenal ten friendly match an khel a, Gunners 2-1 in an chak. Man United ṭantuten Gunners hneh loh aia pawi tih zawk an nei a, chu chu Yoro leh Hojlund inhliam hi a ni.

Thawhlehni khan United States-a Man United innghahna hmun University of California, Los Angeles (UCLA)-ah Yoro hi tiang hawla a kal lai hmuh a ni a, a ke cher khawng a ni bawk.

Kum 18 mi Yoro dinhmun hi tunah chuan a chiang tawh a, October thla tawpah chauh a inlan thei dawn. Hei vang hian Community Shield bakah Premier League match kua, Europa League season tir lam leh League Cup ṭantirh lamah a khel thei dawn lo.

Yoro inlan lohna tur match kuaah hian Liverpool, Tottenham leh Aston Villa te an hmachhawn tur zingah an tel. French defender dinhmun dik tak hi UK-a an let hnuah en chian leh tur a ni a, chutihrualin pre season an neihna hmun US-ah a teammate-te zingah a awm chhunzawm ang.

Kum 21 mi Hojlund-a'n Arsenal lakah minute 10-na lekah goal hmahruai khung mah se minute 16-naah hliam vangin an la chhuak. Danish striker hi malpui hliam vang a ni a, September thla international break zawhah a rawn kir thei ang.

Man United hian defender thar Yoro inhliam vangin an chan rei dawn a, Everton defender Jarred Branthwaite emaw Bayern Munich defender Matthijs de Ligt emaw lak tuma an dawr a rinawm.

Erik Ten Hag-a hote hian nimin khan Real Betis 3-2 in an hneh a; Marcus Rashford, Amad Diallo leh Casemiro ten goal an khung. August 4, Pathianni zing dar 5:00 hian Man United-in friendly match hnuhnung berah Liverpool an hmachhawn ang.