Kylian Mbappe-a'n club a nei!

Real Madrid forward tharlam Kylian Mbappe chuan kum naupangtêin club a nei der - Ligue 2 club Caen-ah share a lei a, hei hi ama din, a company Interconnected Ventures hnuaia investment firm Coalition Capital kaltlanga a lei a ni.

Mbappe hian ama mimal sum, euro maktaduai 15 zet chu French second division club lei nan hian a hmang a, Caen-ah hian 80% share a nei dawn a, kum 25 mi ni chungin Mbappe hian club a nei dawn tihna a ni - a fing tlat!

American investment fund Oaktree chu Mbappe lan hma hian share ngah ber an ni ṭhin a, mahse, an share hi French striker hian a leisak ta a ni - club president ni lai Pierre-Antoine Capton chuan share tenau a neih chhunzawm ve zel bawk ang.

Capton chuan, "Stade Malherbe Caen chuan hmasawn zel a tumna kawnga Coalition Capital a thawhpui thei hi a lawm hle. Infiamna khawvel tana an inpekna leh an hmathlirte thlir hian, kan hmachhawp atan anni nena thawhho theih hi thil lawmawm tak a ni," a ti.

Mbappe hian kum naupangtê a nih laiin Caen-ah hian trial a lo nei tawh a, mahse, a naupan lai pawha player thiam bik la lut turin Caen hian an tlin lo - tunah chuan Caen neitu a ni ta.

Caen hi kum 2019 khan Ligue 1 aṭangin an tla a, season hman zawh takah khan French second division-ah hian pahnihna an ni. Caen chuan thuchhuah siamin, "French football-a sulhnu ropui hnutchhiah zel kan tumna kawnga thil lawmawm tak a ni," tiin neitu thar an nei ta chu a lawmawm an tih thu an sawi.

France captain Mbappe hausakna hi dollar maktaduai 180 bawr vel niin an sawi a, Caen lei nana a sen euro maktaduai 15 hi chu a hmu let har lo ang - a club thar Real Madrid-ah hian season khatah £12.8mtd a hlawh dawn a, image rights aṭangin percentage chan tur a nei a, kum nga chhungin signing bonus £128mtd a dawng dawn bawk.