Gallagher manah Chelsea leh Atletico inrem

Chelsea chuan an midfielder Conor Gallagher lei tuma Atletico Madrid dawrna chu an pawm a, Spanish club hian pound maktaduai 33 bawr velin England international hi lakluh an tum niin khawthlang media-te chuan an tarlang.

Kum 24 mi Gallagher hian Stamford Bridge-ah kum khat chiah contract a nei tawh a, June thla khan Blues hian kum hnih dang contract zawrh mah se a hnar - he contract-ah hian kum khat dang ziah belh theihna dan pawh a tel.

Gallagher-a'n contract a hnar avangin Blues tan season thara a thlawna chhuahtir ai chuan, man a neih theih laia chhuahtir hi thil awm tak a ni. Hetihrual hian English club hnena hralh erawh London club hian an tum lo a, Gallagher hian Spain-a pem a duh ang em, tih chu a ni.

Aston Villa pawhin Gallagher hi lakluh tumin an dawr a, £45mtd zetin ngam mah se Chelsea hian English club thoa kaltir ai chuan ram pawn lama man tlawm zawka hralh hi an duh zawk.

Kum ruk mi lek a nih laia Chelsea zawmtu Gallagher hi season hmasa nipui transfer lai khan Gallagher hi Tottenham Hotspur, West Ham leh Everton te pawhin an lo rim tawh.

England tan vawi 18 inlan tawh Gallagher hian season hman zawh takah khan Chelsea tan inelna hrang hrangah match 50 a khel tling a, goal sarih khungin assist vawi kua a nei.