7 star AFC; Police an 'comeback'

I Day Football-ah nimin khan Aizawl FC-in champion ngei an tum tih lantirin Chawnpui FC chu 7-0 in an sawp a, FC Bethlehem lakah Mizoram Police 2-1 in an chak hram thung.

Group B-ah hian NorthEast United an awm tel avangin 'group of death' tia chhal a ni a, ISL club hi August 5, Thawhṭanniah I League club Aizawl FC nen an inkhel ang.

7 star AFC

Aizawl FC coach Victor Lalbiakmawia'n inkhelh hmain Chawnpui FC hneh thei tur player an luhtir tur thu a sawi a, B. Malsawmzuala hote lakah team ṭha luhtirin hnehna pawh an chang chiang.

1st Bn MAP Ground-a inkhelah minute 10-na lekah Aizawl FC tan striker C. Lalhriatpuia'n goal hmahruai a khung a, minute 22-naah season bul ṭan ṭha Lalbiakdika'n khun gbelhin first half-ah 2-0 a ni.

Second half-ah C. Hriaa leh BD-a ten goal khat ve ve an khung belh bakah C. Lalmuanpuia, Laltlanzova leh Pazawna ten goal khat ṭheuh an khung. FC Goa aṭanga loan hmanga an hawh Zozoa'n Aizawl FC tana a goal hmasa ber a khung a, a u R. Ramdinthara (Tharpuia) angin hmun pawimawh a chang ang em tih chu hunin a hril ang.

Police nge nge

Mizoram Police leh FC Bethlehem inkhelah team nem zawka ngaih FCB-in Lalrochama hmangin minute 33-naah an khung hmasa a, inkhel a nun phah hle.

Lalbiaksanga Colney kaihhruai Police an chungnung a, siphurh sut tumin an nawr na hle. Second half-ah bench aṭangin Malsawmfela, Isaak Malsawmkima leh Michael Lalbiaksanga te a luhtir a, substitution awmze nei a ni.

Sawmfela hian a luh aṭanga rei loteah box chhungah a chest a, a back volley nghal a, goal mawi bik a khung. Police-in siphurh an sut hnuah chakna goal khung tumin theihtawp an chhuah zui a, injury time-ah MPL10 best player H. Lalbiakthanga'n chakna goal a khung.