India-in South Africa an sawp

Shikhar Dhawan-a'n century a siam a, India-in South Africa run 130-in an sawp. World Cup-a South Africa chak loh chian ber ṭum a ni a, World Cup-a India laka an tlawm hmasak ber a ni bawk.

Pathiannia Melbourne Cricket Ground, Australia-a inkhelah India an bat hmasa zawk a, over 50-ah run 307 siamin player pasarih an hloh. South Africa-in run 177 chiah an vaw chhuak a, over 40.2-ah an out fai vek.

Inkhel chu

India batsman-ten inkhel bul an ṭan ṭha a, Pakistan an tum ṭuma an run siam zat 300 aia tam siamin Run 307 an tlin. World Cup-a run 300 aia tam umpha thei team hi Ireland, Sri Lanka leh England chiah an la awm a, South Africa tan an target run 308 umphak a huphurhawm hle.

India batsman zingah tunhnaia sawisel hlawh Shikhar Dhawan a che ṭha a, amah sawiseltu te field chhungah run hmangin a chhang let. Kum 29-a upa Delhi tlangval hian ball 146 a hmachhawnah run 137 a vawchhuak a, dinhmun duhawm takah India a hlangkai. Ajinkya Rahane-a che ṭha bawk a, ani hian ball 60-a hmachhawnah run 79 a vawchhuak.

South Africa bowler te'n India batsman-te an ngam ngang lo a ni ber a, an bowler zinga che ṭha ber Morne Morkel chuan run 59 pein wicket hnih chiah a la thei.

South Africa bat hun a thleng a, India bowler te'n an ngam hle. South Africa tana run siam hnem ber Faf du Plessis chuan ball 71 a hmachhawnah run 55 a vawchhuak a, a out. South Africa tan an innghahna leh an captain ni bawk AB de Villiers-a'n bul ṭan ṭha mah se ball 38 a hmachhawnah run 30 vawchhuakin a run out. Hemi hnu hi chuan South Africa lam hi an out mawlh mawlh a ni ber.

Bowling lamah India tan inhliam dam leh Ravichandran Ashwin-a che ṭha a, run 41 chiah pein player pathum a vawm hlum. World Cup hmaa sawisel nasat India bowler te a hun takah an che ṭha.

Eng nge an sawi?

Man of the match a thlan Dhawan chuan, "World Cup hmaa ka khelh chhiat vangin sawiselna nasa tak tawk mah ila, hahdam leh nuam ti takin ka khel a, ṭha takin ka khelhchhuah theih phah a ni. Run 79 siamtu Rahane leh run 46 vawchhuaktu Kohli te'n min pui ṭha bawk a, kan chak ta a ni," a ti.

India captain MS Dhoni chuan, "South Africa lam hi team ṭha tak an ni tih hre sa chungin kan khel a, hnehna kan chang thei hi kan lawm hle," a ti bawk.

South Africa captain AB de Villers chuan, "India khan bul an ṭan ṭha a, an batsman-te'n ṭha taka bul an rawn ṭan avangin kan hneh zo ta ngang lo a ni. Chhuanlam siam tur awmin ka hre lo, kan hneh lo a ni mai," tiin chhuanlam a siam duh lo.