Dortmund an sang tual tual

2007 Bundesliga champion VfB Stuttgart leh 2010 hnua vawi hnih champion Borussia Dortmund te'n 2014/15 season-ah hun harsa tak an tawng a, match 22 hnuah pakhat zawk an ro tulh tulh laiin pakhat zawk erawh an hring leh ṭan ta.

Zirtawpni zan khan Mercedes Benz Arena-ah goal nga a lut a, Dortmund-in mualneitu Stuttgart 3-2 in an hneh. Jurgen Klopp-a team-te hian league-ah a zawnin vawi thum an chak a, point 25 hmuin a mawngphaha awm Stuttgart aiin point sarihin an sang zawk. Stuggart hian match hnuhnung parukah chak hmel an hmu tawh lo.

Dotmund-in Pierre Emerick Aubameyang hmangin minute 25-naah hma hruai mah se Stuttgart-in minute sarih hnuah Florian Klein penalty hmangin an sut. Minute 39-naah Dotmund mifielder IIkay Gundogan-a'n a pet goal a, first half-ah 2-1 a ni. Minute 89-naah Marco Reus-a'n Dortmund goal thumna a khung a, German defender Timo Baumgartl tihsual a ni. Kum 18-a upa Baumgartl hi inkhelh banah supporter ṭhenkhat hnem a ngai hial.

Stuttgart-in injury time-ah Georg Niedermaier hmangin goal khung leh mah se result a danglam phah lo. 3-2 in Dortmund an chak. Stuttgart attacking midfielder kum 18-a upa Timo Werner chu Bundesliga-a match 50 khel thei naupang ber a ni.

Stuttgart sports director Robin Dutt chuan, "Referee khan engtin nge red card a pek loh theih. A chang hi chuan thutlukna hi chu a mak ṭhin khawp mai," tiin penalty chawitu Nuri Sahin chu hnawhchhuah a phu thu a sawi.