Khatla TBL-in Tuikual South an hneh

Samsung 3:16 Plan Solution Mizoram Super League a hmuhnawm zel. Zirtawpni tlaiah Khatla TBL BC-in Tuikual South BC 68-61 in an hneh.

Hawla Indoor stadium-a inkhelah hian beisei ang ngeiin mipui pungkhawm an ṭhahnem a, inkhel a hmuhnawm bawk.

Zirtawpni-a MSL match hmasa zawkah club hlun ber Khatla TBL leh Playoff champion Tuikual South inkhel boruak aṭanga, fans thawm pawh a ṭha hle.

Inkhel an ṭan a, Tuikual South-in inkhel thunun chungin boruak ngam zawkah an ṭang. MSL playoff boruak sang tak hnuaia lo khel tawh an nihnain a pui tih a hriat a, player-te an inringtawk hle. First quarter-ah 10-9 in hma an hruai.

Khatla TBL an awm mai mai bik lo. An squad neih chhah an chhawr ṭangkai a,'team perfomance' lantirin reiloteah inkhel thununtu zawkah an ṭang thei. An in um tawn zak zak a, a tawpah squad chhah zawk leh club hlun zawk Khatla TBL an chak.

Khatla TBL tan player/coach H.Laldinsanga (Mapuia) a ṭangkai a, bench aṭanga tlanlutin a team tan a theihna a rawn pholang a, points 18 lai a hlawh chhuak. Khatla TBL-in 'team' game mawi tak an khelchhuak a, captain Lan-a'n a team-te a kaihhruai ṭhat zia a lang.

Tuikual South tan Lalfak­zuala (Mafaka) a che ṭha a, Tuikual South tlangval hian a team tan points 20 hlawh chhuakin rebound pangnga a nei bawk. Captain F.Zodinthara'n ṭum dang pha lo a, point kua chiah a hlawhchhuak.

Tuikual South tan Playoff-a an player pawimawh Vanchuang­pui-a'n beisei a phak lo a, Dina nen an point score zat a inang.

Egnge an sawi?

Khatla TBL secretary Samuel Lalfana chuan, "Kan khel chhe hran lo. Kan beisei ang erawh chuan kan player-te'n an la khelchhuak tawk lo niin kan hria a, match hmasa ber a nih vangin boruak kan la zo tawk lo deuh a ni maithei. Kan chak dan pawh kha chak ṭawk ṭawk kan ni a, Pathian ṭanpuina vang liau liau a chakah kan inngai," a ti.

Tuikual South captain F. Zodinthara chuan, "Kan beisei aiin kan khel ṭha zawk. Kan squad leh an squad neih dante enin kan rin aiin kan khelchhuak ṭha a, kan hneh lohna kha tlemte chauh a ni. Chutih rualin insiamṭhatna tur erawh kan ngah a, kan chak lohna laite in enin match lehah chuan tun aia ṭha zawk hian khelh chhuah kan tum ang," a ti.