Arsenal chak zanah United chak lo

Inrinni English Premier League inkhelah Arsenal in Crystal Palace khelmualah point thum an hlawh chhuak a, Manchester Uniteh-in Swansea khelmualah point thum an hloh thung.

Point thum hmu Arsenal in Cham­pions League khel turin an dinhmun an siam ṭha a, point hloh United erawh Pathianni zana Southampton result azirin panganaah an tawlh hniam thei.

Laipui a puak

Selhurst Park-a inkhelah hian mikhualin bul an ṭan ṭha zawk a, ṭan aṭanga minute 10 pawh a liam hmain Pape Souare chuan Danny Welback a tihtluk avangin penalty a chawi. Hei hi Gunners tan Santi Cazorla chuan goal-ah a chantir nghal.

Cazorla hian tun season-ah Arsenal tana a goal sarihna a khung.

A hliam a dam hnua rawn khel ṭha tluang tak French striker Olivier Giroud chuan half time hma chiahin goal a khung a, tun hnaia game hnuhnung pasariha a goal ngana a ni der tawh. Glenn Murray chuan hun tawp hma chiahin goal khat khung ve mah se Palace-in point an hlawhchhuak zo ta lo.

Crystal Palace hian Arsenal hi an hneh khât hle a, Arsenal laka an chak hnuhnung ber chu 1994 khan Highbury-ah 2-1 a an chak kha a ni daih tawh. Hemi hnua an inkhelh hnuhnung 11-ah chuan Arsenal hi an hneh leh tawh lo a ni.

Inrinni result avang hian Arsenal chu table-ah pathumnaah an inhlangkai a, nikum August hnua an dinhmun ṭhat ber ṭum a ni.

Wenger a lawm

Arsenal manager Arsene Wenger chuan, "Kan khingpuite khan an theihna zawng zawnghin an khel a, khelh an harsa hle. Point thum kan hlawhchhuak thei hi kan vannei takzet. Ṭha taka a kan khelh chhunzawm zel ka beisei," a ti.

Arsenal-in hma an sawn zel a, sea­son tawp dawna che ṭha ṭhin Wenger-a naute'n an zia an chhuah ṭan e.

United an tlawm

Season thara Champions League khelh tum Man United chuan table-a pakuana Swansea chu 1-2 in an hneh lo.

Liberty Stadium-a inkhelah hian United lamin inkhel bul an ṭan ṭha. England defender Luke Shaw thawhrah sengin Spanish player Ander Herrera chuan minute 28-naah goal a khung. United fans-te hlim au thawm pawh a reh hmain Jonjo Shelvey ball siamsak chu Ki Sung-yueng chuan a thun zui nghal a, 1-1 a ni - United tlarhnung an hawi buai. First hlalf-ah goal a lut tawh lo a, second half-ah Swansea tan -ah helvey pet ṭha zet chu Bafetimbi Gomis chuan a lo dang pial zauh a, David de gea tana man harsa tawk chiahin a awm a, a goal. United-in an si phurh an sût thei lo a, Maroune Fellaini tana ball vawrh vak vak bak an ti hleithei lo.

Swansea double

Tun season league game hmasa berah Swansea hian Old Trafford-ah Man United hi 2-1 thoin an lo va hneh tawh bawk, season khata United an hneh 'double' vawi khatna a ni.

Man United hian League game 26 khelh tawhah point 47 hmu in palina an ni mek a, an chung chiaha awm Arsenal point khatin an pha lo.

United-in goal hlauhawm an nei mang lo a, tlar hmaa an player hlawh tam rualte chu Swansea defender lâr lo tak takin an veng hneh hle. Swansea zawkin counter attack-ah goal hlauhawm an nei fo zawk.

United boss Louis Van Gaal-a'n goal nawr ngaihna a hriat loh hnuah Fellaini tan ball a vawrhtir vak vak a, awmzia a nei si lo. Radamel Falcao chu hman lohin bench-ah a ṭhu tluan.

Eng nge an sawi?

United boss LVG chuan, "Inkhel thunun tak chung sia point thum kan hmu lo kha kan vanduai hle. Robin Van Persie inhliam kha a pawi hle a, substitution kan hman zawh tawh avangin thlak theih a ni si lo, kan vanduai hle a ni," a ti.

Swansea boss Garry Monk chuan, "Kan khingpuite kha player ṭha tak tak an ni a, manager ṭha takin a enkawl an ni bawk. Mahse theihtawp kan chhuah a, kan phu ang ngeiin chak result kan hlawhhchhuak a ni," tiin a sawi.

Inrinni zan Premier League inkhel dangah manager thar Tim Sherwood-a enkawl Aston Villa chuan Villa Park-ah Stoke City chu 1-2 in an hneh lo a, Hull City-in an mikhual Queen Park Rangers chu 2-1 in an hneh thung.

Sunderland leh West Brom te inkhelah goal a lut lo.