Barca an tlawm; Atletico an chak

Inrinni zan Spanish La Liga inkhelah Barcelona-in League hmahruaina hun ṭha an bawh pelh a, Nou Camp-ah Malaga 1-0 in an hneh lo. Pathumna Atletico Madrid-in Vicente Calderon-ah Almeria 3-0 in an sawp a, Barca nen point thum chauhin an inthlau tawh.

Goal khat a tawk

Nou Camp-ah Barcelona-in minute 90 chhungin goal a khungn thei lo a, Malaga-in Brazilian defender Dani Alves chetsual zar zoin minute sarihna lekah Jimenez Lopez hmangin goal an khung a, chakna goal a ni zui bawk.

Barca right back Alves back pass chu a nat tawk loh avangin goalkeeper Claudio Bravo-a thlen hmain Lopez hian nang chingin Malaga tan goal pawimawh a khung. Spanish forward kum 21-a upa Lopez hian goal khungna hun ṭha dang a hmu leh a, amaherawhchu Barca goalkeeper Bravo a paltlang nawn lo.

Barcelona hian inkhel thununin ball possession 73% zet chang mah se an mamawh ber goal an khung thei lo. Barca trio Lionel Messi, Neymar leh Luis Suarez te'n Malaga tlar hnung an su hawng zo lo a, 1-0 in an tlawm ta ni.

Barcelona hi game 11 chhung an chak zawn tawh a, an game hnuhnung 11-ah hian goal 42 khungin top scorer Messi hian an game hnuhnung 11-ah goal 10 a khung. Catalan club hian record ṭha tak nei mah se Inrinni zanah Malaga hmaah an record ṭha hi chhawm nung zo lo.

Nikum September khan team pahnihte hi Malaga khelmual La Rosaleda Stadium-ah an lo inkhel tawh a, goal awm loin an inhnehtawk. Kum 2007-08 khan Getafe chuan league game hnihah Barcelona lakah goal an chhuah lo a, hemi hnua Barca laka league game hnih chhung goal chhuah lo leh hmasa ber chu Malaga hi an ni.

Boss thukhawchang

Barcelona coach Luis Enrique chuan, "Chak reng theih a ni lo a, kan chesual ve thei tho a ni. Kan result hian team dang ten theihna sang tak an nei ve tho a ni tih min hriat nawn tir se a ṭha khawp ang." a ti.

Barca boss chuan sawi chhunzawmin, "Tihsual leh chak loh hi player zawng zawng thiam loh a ni a, pakhat chauh dem tur a ni lo. A mawhphurtu ber erawh player ni loin coach a ni a, team pumpui thiam loh a ni," tiin Alves-a tihsual vang ringawt chak lo an nih loh thu a sawi.

Malaga coach Javi Gracia chuan, "Barcelona hneh tur chuan tih dik tur tam tak a awm. Player ṭha rual awm khawmna an nih avangin tlar hnung rem phui

ṭhat a ngai a, chance neih chhun hlah a thiang lo bawk. Minute 90 chhung rim tak leh awmze nei taka kan thawh avanga point thum hlawhchhuak thei kan ni. A zawna vawi hnih chak loh hnua hnehna kan chang thei hi kan lawm hle a ni," tiin a sawi.

Pathumna Atletico

Champion lai Atletico Madrid chuan an lallukhum hum him tumin theih tawp an chhuah zel a, an mikhual Almeria 3-0 in an sawp. An chung chiaha awm Barcelona an phak lohna chu point thum chauh a ni ta.

Madrid khelmual Estadio Vicente-a inkhelah hian Atletico tan Mario Mandzukic chuan inkhel ṭan aṭanga minute 11-na lekah penalty aṭangin goal a khung a. French forward Antoine Griezmann-a'n minute 20-naah Atletico goal hnih a khung a, minute kaw hnuah goal dang khung lehin Griezmann hian tun season-ah goal 17 a khung tawh.

Second half-ah goal a luh belh lo a, minute 90-naah Atletico left back Guilherme Siqueira-a'n handball vangin vangin yellow card vawi hnihna a hmu a, hnawh chhuah nghal a ni.

Atletico hian kar liamta khan Celta Vigo 0-2 in an hneh lo a, an chak loh hnua an insiamṭhat theih nghal avangin pathumna an ni chhunzawm zel. Inrinni zan vek khan palina Valencia-in an khingpui Cordoba 2-1 in an hneh a, Atletico nena an inkarah point thum chauh a awm.

Eng nge an sawi?

Goal hnih khungtu Griezmann chuan, "Point thum kan hlawhchhuak thei hi a lawm awm hle a ni. League game kan khelh leh zel turah pawh result ṭha kan hlawhchhuah zel ka beisei. Kan khelh danah khan kan khelmual kan hmang thiam tih a lang a, kan ṭha tawk tih a lang bawk. Kan khelhpuite zara goal hnih ka khung thei a, ka kawppui Mandzukic hi khelh pui a nuam ṭhin hle," tiin a teammate-te a fak.

Atletico manager Diego Simeone chuan, "Barcelona leh Real Madrid te hi champion tura rinkai an ni a. Valencia, Sevilla leh kan club hian point ṭhahnem tak kan hmu tawh a, kan inel tawk avangin kan league result hi a ngaihnawm em em a ni," tiin a sawi.

Inkhel Results

Getafe 2 - 1 Espanyol

Barcelona 0 - 1 Malaga

Córdoba 1 - 2 Valencia

Atletico Madrid 3 - 0 Almeria

Deportivo 0 - 2 Celta de Vigo