Bayern Munich-in goal an sur tir

Bundesliga-ah hmahruaitu Bayern Munich-in goal an sur tir zel a, kar liamtaa Hamburger 8-0 a an sawp hnuah Inrinni zan khan Paderborn 6-0 in an sawp leh bawk. Champions League-ah Bayern hian Shakhtar Donetsk goal awm loin an draw a, league lama an result erawh a khawih buai lo.

Bayern hian match 22-ah point 55 an hmu tawh a, anmahni hnaih bertu Wolfsburg aiin point 11-in an hmu tam zawk. Nizan khan Wolfsburg leh Hertha Berlin an inkhel a, result kanhre hman lo.

Benteler Arena-ah mikhual Bayern an khel ṭha takzet a, Robert Lewandowski leh Arjen Robben te'n goal hnih ve ve an khung a, Franck Ribery leh Mitchell Weiser te'n goal khat ve ve an khung bawk.

German midfielder Mario Gotze aia lut Polish striker Lewandowski hian minute 24 leh 37-ah goal a khung a, minute 63-naah Paderborn player Florian Hartherz-a'n Dutch winger Robben a tihtluk avangin penalty a chawi a, hnawhchhuah a ni. Penalty hi Robben-a'n goal-ah a chan tir a, minute 72-naah Ribery chuan an goal lina a thun zui ve leh bawk.

Minute 78-naah kum 20-a upa Weiser-a'n bayern goal ngana a khung a, hun tawp hma minute thum ala awm tihah Robben-a'n inkhela a goal hnihna a khung a. Bayern Munich 6-0 in an chak.

Robben hian tun season inelna hrang hrangah goal 18 a khung tawh. Bayern hian league game hnuhnung pahnihah goal 14 zet khungin an goal khat mah an chhuah lo.

Inkhel dang results

FSV Mainz 3 - 1 Frankfurt

FC Augsburg 2 - 2 B Leverkusen

Schalke 1 - 1 Werder Bremen

Freiburg 1 - 1 Hoffenheim

FC Cologne 1 - 1 Hannover