West Indies laka mualpho Pakistan

Inrinni khan 2015 World Cup-a India laka mualpho Pakistan chu West Indies lakah an mualpho nawn a, run 150 zetin an chak lo.

Hagley Oval, New Zea­land-a inkhelah hian Ireland laka mualpho West Indies bat hmasa zawkah an ṭang a, over 50-ah run 310 siamin mi paruk chiah an hloh a, Pakistan tan um huphurhawm tak a ni.

Pakistan bat hun a thleng a, over 39 thleng chiah an khel tihin player zawng zawng an out vek a, run 160 an tlin hram.

West Indies tan Jerome Taylor a langsar a, kum 30-a upa fast bowler hian run 15 chiah pein wicket thum a la bawk.

West Indies tan kum 26-a upa Andre Russell-a'n a theihna a pholang bawk. West Indies all rounder hian bowling lamah wicket thum lain run 33 chiah a pe a, ball 13 a hmachhawnah run 42 vawchhuakin a tawp thlengin a dam bawk.

Australia leh Bangladesh inkhel tur erawh ruahsur leh thlipuiin a tihbuai vangin an khelh hun tur sawn a ni a, an khelh leh hun turah thu chiang a la awm rih lo.