Khawvelin a nghahhlelh a nghak chhuak ta May 2-ah Mayweather Vs Pacquiao
Boxer ropui Floyd Mayweather Jr. leh Manny Pacquiao te hi kum nga liam ta khan inhnek ta se duhthusam a ni ang. Chhutihrualin tun ṭuma an intawng tur hi dah hniam chi a ni chuang lo - Football-a World Cup final leh American football-a Super Bowl te aia dah sang zawk an tam, khawvelin May thla thleng thuai thuai se an ti hle.
American Mayweather leh Filipino Pacquiao-te hi an hunlaia ṭha ber ve ve a ngaih an ni a, May 2-a MGM Grand, Las Vegas a an inhnekna tur hi boxing history-a pawisa tamna ber tur a ni.
Mayweather-Pacquiao inhnek tur aṭang hian pound maktaduai 162 hmuh chhuah beisei a ni a, hemi hmaa pawisa tamna ber nia ngaih chu kum 2013-a Mayweather leh Saul Alvarez te inhnek kha a ni a, pound maktaduai 97 hmu chhuak anga chhut a ni.
Forbes-in infiammi zinga hlawh tam bera a chhal Mayweather-a'n pawisa dawng tam zawk dawn. American boxer hian 60% a dawng ang a, Pacquiao-a'n 40% a dawng thung ang. Showtime leh HBO te thawh dun zarah boxer ropui-te inhnek hi a hmuh theih dawn a, cable network inel tak hi an vawi hnih thawhdunna chauh a ni.
An thawh dun hmasak ṭum hian HBO hnuaia contract nei heavyweight champion Lennox Lewis leh Showtime hnuaia contract nei champion hlui Mike Tyson te chu kum 2002 khan an intawng. Mayweather hi Showtime hnuaia contract nei a ni a, Pacquiao hi HBO hnuaia contract nei a ni thung.
Kumin January 27 khan Mayweather Jr. leh Pacquiao te hian NBA-a Miami Heat inkhel an thlir a, halftime-a an inhmuh zawk hnuah inkhelh banah an mipui hmuh lohin an inbe chhunzawm bawk. Basketball ennaa hmai chhana an inhmuh ṭum hian phone number an inpe a, an khawsak dan aṭangin khawvelin beiseina thar a nei a, thla khat pawh a liam hmain an inhnek dawn tih a chiang ta bawk.
Mayweather leh Pacquiao te hi weight inang ni chung siin khawvela ṭha bera chhal ve ve an ni a, mipuiin an pahnih inhnek an hmu châk ṭhin nachungin an inbiakna an hlawhchham leh ṭhin.
Tunhnaia ṭha zawka ngaih chu Mayweather hi a ni. American boxer hi Grand Rapids, Michigan-ah a piang a, Las Vegas-ah a cheng thung. Mayweather hian professional career-ah ṭum 47 inhnek tawhin a la chak fai vek a, knockout 26 zet a nei tawh. Weight class pangaah world champion a ni tawh a, defence a thiamna leh a kut rang tak chu an sawi uar ber a ni. Kum 37-a upa Mayweather hi WBC & WBA welterweight leh WBC light-middleweight champion lai a ni.
Mayweather chuan, "Manny nena kan intawng tur hi ka lawm a ni. Supporter-te duhzawng hmuh tir hi ka duh dan a ni a, kan inhnek tur hi sports history-a thil thleng lian ber tur a ni," a ti.
Pacquiao (57-5-2, 38 KOs), kum 36-a upa southpaw hi a chet ranna, chakna leh thiamna avangin khawvelin a ngaisang a; boxer zinga weight class pariat - flyweight, junior featherweight, featherweight, junior lightweight, lightweight, junior welterweight, welterweight leh junior middleweight a champion vek thei awmchhun a ni.
Pacquiao chuan, "Floyd Mayweather nen kum tam tak chhung mipui hmuh châk tawh kan hmuh tir thei tur hi ka lawm hle a ni. An nghak rei tawh a, kan inhnek tur hmuh hi an phu a ni. Infiamna history pawimawh taka ka tel ve tur hi ka lawm takzet. Kan inhnek tur hi beiseina nena thlir ṭhintu fan-te hnenah ka hlan a, Philippines tih ropui zel hi ka duh dan a ni a, khawvel hmun hrang hranga Filipinos tan ka hlan bawk," tiin a sawi.