City an chak chiang

Inrinnni zan khan Etihad Stadium-ah Manchester City-in minute 21 chhung lekin goal thum an khung a, hun tawp meuh chuan goal nga an khung tawh. City hian Newcastle United 5-0 in an sawp a, hmahruaitu Chelsea nena an inthlauhna chu point nga chauh a ni ta.

Minute hnihna lekah Sergio Aguero-a'n tun season-a a goal 22-na a khung a, minute 12-naah Samir Nasri-a'n goal hnihna a khung leh bawk. French midfielder hian nikum May thla hnua Etihad Stadium-a a goal khung lehna hmasa ber a ni. Minute 21-naah match 15 chhung goal khung tawh lo Edin Dzeko-a'n goal thumna a khung. Second half ṭan aṭanga minute riat chhungin David Silva-a'n goal hnih a khung leh bawk.

Man City-in African Cup champion Ivory Coast captain Yaya Toure an chhawr leh thei tawh a, game kaihruaitu a ni. Toure hian vawi 134 zet ball a khawih a, pass 125 a nei pha hial a, pass dik percentage pawh 87.2% a tling pha hial. Pound maktaduai 25 man striker Wilfried Bony pawh minute 60-naah Aguero aiah a rawn lut a, goal erawh a keng tel lo thung.

Tun ṭum hi tun sea­son-a City chak chian ber ṭum a ni a, January 4 hnua an khelmuala an chak lehna hmasa ber a ni. Newcastle erawh inelna hrang hrang an hmachhawn hnuhnung pariatah vawi khat lek an chak thung.

City hian Thawhlehni zan hian Champions League last 16-ah Barce­lona an hmachhawn ang.

Newcastle legend Alan Shearer chuan, "Newcastle khan an khawngaihtlak khawpin ka hria, inkhel ṭan tirh aṭanga a tawp thleng khan chet dan tur an hre lo," a ti.

City manager Manuel Pellegrini chuan, "Kan khelmualah goal ṭhahnem tak kan khung a, goal kan chhuah loh bawk avangin kan lawm hle a ni. Team dangin point an hloh hian a lawmawm a, Chelsea-in point an hloh hian a lawmawm lehzual. Tunah chuan Barcelona hmachhawn turin kan inpuahchah thei tawh ang," tiin a sawi.