Chelsea an vanduai

Stamford Bridge-ah Chelsea leh Burnley te 1-1 in an inhnehtawk. Minute 14-na lekah Branislav Ivanovic hmangin Blues-in hma hruai mah se penalty ṭum hnih pek an ni lo a, Nemanja Matic hnawhchhuah a nih hnuah Burnley-in minute 81-naa defender Ben Mee tauh luh hmangin an sut.

Inrinni zan inkhelh hian Chelsea player thar Juan Cuadrado chuan starting eleven a chang a, player langsar erawh Eden Hazard a ni. Belgian winger hian Ivanovic goal khung theihna turin a khalh lut ṭha hle.

Tun season-a Chelsea player pawimawh Matic hi hnawhchhuah a nih avangin March 1-a Tottenham Hotspurs nen League Cup final an khelh hunah a tel ve thei dawn lo a, league-a West Ham leh Southamp­ton an hmachhawn hunah a khel thei lo bawk ang.

Portuguese manager Mourinho chuan, "Minutes 30, 33, 43 leh 69-naa thil thleng kha in duh chuan in lo sawi zui dawn nia, kei chuan hrem nih ka duh lo a, ka sawi zui lo ang," tiin inkhelh banah a sawi.

Mourinho lungawi lohna

30th minute : Burnley keeper Tom Heaton ball pet chhuah chu Ivanovic leh Ashley Barnes te'n an inchuh a, Barnes hian Chelsea defender hi pet mah se referee-in freekick a pe lo.

33rd minute : Juan Cuadrado pass chu Ivanovic-a'n pet nghalin Michael Kightly kut fuh mah se referee Martin Atkinson-a'n penalty a pet tlat lo.

43rd minute : Diego Costa-a'n Burnley defender Jason Shackell a bum a, Shackell hian a tihusal siam ṭhat a tumna lamah Costa hi a namthlu a. Penalty awm tak ni mah se referee ngaihdan a dang thung.

69th minute : Serbia midfielder Matic chuan thinrim vangin Barnes a nam thlu a, hnawhchhuah a ni. Mourinho chuan, "Minute 30-na leh minute 69-na hian inzawmna thuk tak a nei a ni. A hmasa zawkah khan referee khan thutlukna dik tak chu siam se, a hnuhnung zawk hi a thleng lo ang," a ti.

January thla khan Football Association-in Mourinho hi ṭawng tam vangin £25,000 a lo chawi tir tawh. Portuguese manager hian Chelsea chak loh nan referee rilru tibuai turin club dangin campaign a nei tiin club dang zawng zawngin an ṭan rawn niin a lo sawi tawh.

Ngaihdan nei Dyche

Burnley manager Sean Dyche chuan, "Vanneih reng theih a ni lo. Kar hmasa khan West Brom kan hmachhawn ṭum khan penalty hmu tur kan ni a, pek kan ni bik lo. Season khat chhung chuan kan vanneihna leh vanduaina hi a intluk tawk ka beisei," tiin Chelsea chiahin referee thutlukna an tawrh bik loh thu a sawi.

Dyche chuan, "Ka player-te hian inrintawkna an nei a, Premier League-a khelh zel hi kan tum tlat a ni," tiin a sawi.