Mizoram Police Sports Meet hawng

Mizoram Police Sports Meet chu nimin khan Rajiv Gandhi stadium-ah ṭan a ni a, Sports minister Zodintluanga'n a hawng. Police Sports Meet hi February 23-27, 2015 chhung neih a ni ang.

Zodintluanga chuan, police-te'n dan leh thupek ṭha takin an kengkawh nia sawiin, Mizoram mipuite thlamuang takin an awm theih phah niin a sawi a, "Police-te thawhrimna azarah remna leh muanna ṭha taka vawn a ni a, sorkar pawhin hmasawnna hna ṭha takin a thawh theih phah a ni," a ti.

Sports Minister chuan, police-te inpekna avangin Mizo ṭhalaiten infiam­na lama hma an sawn theih nan Rajiv Gandhi Stadium sak a ni tih a sawi a, "Infiamna hmunhma tihchangtlun chhoh zel azarah ram pum huap pawhin Mizoram, state tê tak tê chuan champion nihna a hauh thei ta a ni, " a ti.

DGP Dharmendra Kumar pawhin thu sawiin, police hna ṭha taka thawk tur chuan hriselna ṭha a pawimawh avangin infiamna hun buatsaih ṭhin chu thil ṭangkai tak a nih thu a sawi a; police awmna hmuna stadium siam a ni chu lawmawm a tih thu a sawi bawk.

Mizoram Police Sports Meet-ah sport discipline hrang hranga tel turin infiammi 1,228 an kal khawm a ni.