Ronaldo-a'n goal a khung leh ta

Pathianni zan khan La Liga hmahruaitu Real Madrid chuan an hmahruaina sawhnghet nan Elche 2-0 in an hneh. Real hian table-ah point 60 hmuin Barcelona aiin point liin an sang fal ta.

Elche khelmual Estadio Manuel Martinez-a inkhelah first half-ah goal a lut lo. Second half minute 56-naah French striker Karim Benzema-a'n Real hmahruaina goal a khung a, Portugal captain Cristiano Ronaldo chuan minute 69-naah Isco ball cross chu a tauh lut bawk.

Ronaldo-a'n game hnuhnung pathumah goal a khung lo a, Ballon d'Or chawimawina dawngtu Ronaldo goal khung lo hi media lamin an sawi zui nasa a, tunah chuan a goal khung chung­chang an sawi zui leh tawh ang.

Goal hmahruai khungtu Benzema hian tun season-ah Real tan goal 18 a khung tawh. Real Madrid goalkeeper Iker Casillas-a'n club tan league game 500 a khel tling ta chiah a, Spanish keeper hian mellung pawimawh tak a phum zanah goal chhuah loin a team te a chak pui.

Real Madrid superstar Ronaldo hian club tan inelna hrang hrangah game 281 a khel tawh a, goal 290 zet a khung tawh bawk. Real Madrid tana goal khung hnem ber Raul Gonzalez-a chu goal 33 chiah in a pha tawh lo. Raul hian Real tan hian game 741 khelin goal 323 a khung a ni. Real tana goal khung hnem ber dawttu chu Alfredo Di Stefano a ni a,ani hian game 392 khelin goal 305 a khung a ni.

Tun season bikah Ronaldo hian Real tan inelna hrang hrangah goal 38 a khung tawh a, Spanish League-ah goal 29 thun tawhin top scorer a ni mek. Champions League-ah goal ruk thun tawhin UEFA Super Cup-ah goal hnih khung tawh a, Copa del Rey-ah goal khat a khung bawk.

Real boss Carlo Ancelotti chuan, "Barcelona nen kan inthlauhna kan ti zau thei hi a lawmawm hle, chutihrualin tun dinhmunah chuan champion sawi a la hun lo. Season tawp hunah champion chu a hriat chauh ang, inthlahdah thei kan la ni lo. Tunah hian kawng chanve kan zawh chauh a ni a, a chanve dang kan la zawh tur hi ṭha taka kan hman a pawimawh ang," a ti.