Tottenham point hmuhna Kane-a goal

White Hart Lane-ah West Ham United-in goal hnih khung hmasa mah se Tottenham Hotspurs lakah an humhim zo lo, 2-2 in inkhel a tawp.

Pathianni zan inkhelah Spurs boss Mauricio Pochettino-a'n Fiorentina an hmachhawn ṭuma a bul ṭan lo player paruk ngawt a tirah a luh tir nghal ṭhawt a, chak a duhzia leh season thara Champions League khelh a tum zia a ti lang chiang hle.

Mikhual West Ham-in bul an ṭan ṭha zawk a, goal pawh an khung hmasa nghe nghe. Senegalese midfielder Cheikhou Kouyate-a'n minute 22-naah Hammers hmahruaina goal a khung, Spurs tlar hnung nawi zarah vei lam aṭangin Aaron Cresswell-a'n cross ball ṭah tak neiin Kouyate hian a tauh lut. Spurs keeper Hugo Lloris che ṭhat zarah first half-ah goal dang a luh belh lo.

Second half-ah West Ham bawk an khel ṭha chhunzawm a, minute 62-naah Senegal striker Diafra Sakho-a'n Hammers goal hnihna a khung.

Spurs-in an si phurh sut tumin an nawr let zui a, Danny Rose chuan West Ham keeper Adrian dan hman lohin minute 81-naah hla tak aṭangin a thlawh goal a. Spurs an phur zel a, minute 90-na thlengin goal goal lut tawh lo mah se injury time-ah goal a lut. Minute 94-naah Arsenal player hlui Alex Song chuan Harry Kane a tih tluk vangin penalty a chawi a, Kane hian a penalty hlawhchhuah hi pet nghalin Spanish keeper Adrian-a'n dan sak mah se a per chu English forward hian chiang takin a khung.

Kane-a goal khung hi Premier League-a goal lut tlai ber dawttu a ni a, minute 95 leh second 57-naah a thun a ni. Goal tlai ber chu Liverpool defender Martin Skrtel thun a ni a, December thla khan minute 96 leh second nga-naah Arsenal draw-na goal a khung.

Tottenham hian League game 26 khel tawhin point 44 an hmu mek a, an chung chiah a awm Liverpool nen an inkarah point khat chauh a awm a; an hnuai chiaha awm West Ham hian point 39 an hmu tawh.

Eng nge an sawi?

Spurs manager Mauricio Pochettino chuan, "Inkhel kan thunun a goal shot pawh ṭum 22 zet kan nei, kha aia tam kha khung awm tak kan ni. Mah se hun tawp hma minute 10 chhunga goal hnih kan khung thei kha ka lawm hle," tiin point an hlawhchhuah avanga a lawmthu a sawi.

West Ham manager Sam Allardyce chuan, "Goal hnih kan khung hnu kha chuan chak turah kan inngai hman tawh a, mahse goal hnih kan chhuah leh si a pawi tak zet a ni. Kane-a penalty area chhunga a tlu kha ka dem hran lo," tiin chhuanlam a siam lo.