South Africa hnehtu India lawm

Pathianni khan India-in a vawi khat nan ICC World Cup-ah South Africa an hneh a, an hneh mai ni loin an sawp. India fan-te lawmin an au a, an zai. A awmlo hran lo, India hi World Cup ṭan hma khan champion tura rinkai zingah champion lai nichung siin an tel pha lo.

Khawvelin India hi an veteran player Virender Sehwag, Gautam Gambhir, Zaheer Khan leh 2011 Cricket World Cup-a 'Player of the tournament' Yuvraj Singh te hruai tel lo chunga an champion theih an ring lo.

Amaherawhchu an match hmasa berah Pakistan run 76-in an hneh a, India mipuiin Mahendra Singh Dhoni leh a nauteah rinna a nghat ṭan. Pathianniah India-in South Africa run 130 in an sawp leh a, khawvelin champion tura rinkai a sawi apiangin India a sawi tel a ngai tawh ang.

Kum 1992, 1999 leh an champion kum 2011-ah khan India hian South Africa an hmachhawn a, an hneh lo vek. South Africa tan run 130 laia chak loh hi World Cup-a an chakloh chian ber ṭum a ni a, India tan kum 2007-a run 257 zeta Bermuda an hneh hnua an chak chian leh ber ṭum a ni thung.

Entu an Ṭhahnem

South Africa bowling coach Allan Donald chuan inkhelh hmain, "Melbourne Cricket Ground hi India tan chuan an khelmuala khel ang mai an ni dawn a, fan-te puihna an dawng nasa dawn a ni," tiin a lo sawi tawh a, a sawi sual lo. Fans 86,876 zet MCG-ah hian an pungkhawm a, a tam zawk khan India fans an ni. Hawina apiangah India flag hmuh tur a awm a, 'India jeetage' (India kan chak dawn) tih authawm a ri ring hle.

Mipui an lawm

India a vawikhat nan ICC World Cup-ah South Africa an hneh a, cricket atchilhna ram India mipui, milar (celebrities) aṭanga India ram hruaitu lu President leh Prime Minsiter thlengin India an lawmpuina thu an tlangaupui.

India President Pranab Mukherjee chuan, "ICC World Cup match hniha in chak avang leh World Cup-a South Africa inhnehna hmasa ber vang hian ka lawmpui a che u," tiin India team a lawmpuina thu twitter kaltlangin a puangchhuak a.

Prime Minister Narendra Modi pawh a bang chuang lo, "Inkhel ropui tak a ni. Team India ka lawmpui che u a, nangmahni vangin kan hawisang hle a ni," tiin a twitter-ah a ziak ve bawk.