Dost-a goal hmangin Wolfsburg an chak

VfL Wolfsburg-in an khingpui Hertha Berlin 2-1 in an hneh a, hmahruaitu Bayern Munich nen an inkar zau lutuk tur an sawr zim hret.

Pathianni zan Bun­desliga inkhelah Wolfs­burg tan Dutch striker Bas Dost chuan minute 10-na lekah Chelsea player hlui Andre Schurrle siamsak hmangin goal hmahruai a khung a, minute 74-naah Luiz Gustavo-a goal ban pet per lo let leh chu Dost bawk hian a thun zui a. Hertha Berlin tan Julian Schieber chuan first half-ah Hertha Berlin tan goal khat a khung ve bawk.

Wolfsburg hian an League game hnuhnung 10-ah hneh loh an tawng lo a, table-ah pahnihna niin hmahruaitu Bayern Munich point riat chiahin an um pha lo.

Goal hnih khungtu striker Dost hi tunlai hian a khel ṭha tluang hle a, league game a khelh hnuhnung pathumah goal sarih lai a khung a, tun season-ah goal 11 a khung tawh a. Tun hnai ni kaw chhungin goal riat a khung hman a ni.

Goal hnih khungtu Dost chuan, "Team ṭha tak kan nih avangin inkhel harsaah kan chak hram a ni. Kar laihawlah kan inkhelh bawk avangin kan chau a, chuti chung chuan kan theih tawpin kan bei a chakna goal kan khung hram a ni," a ti.

Hertha coach Pal Dardai chuan, "A dik tak chuan kan khingpui te kha team ṭha zawk an nia, mahse kan theihna zawng zawngin kan khel a point kan hlawhcchuak ṭep a ni. Ka nau te khelh danah ka lawm hle, kan vanneih ni chu nise point khat hmu tur kan ni," tiin a sawi.