Zaninah Juventus Vs Dortmund
Turin-a Italian champion Juventus leh Borussia Dortmund inkhel tur hi 1997 UEFA Champions League final rematch a ni. Zanin dar 1:15 hian Juventus stadium-ah sulhnu nei ṭha club pahnihte hi an inkhel dawn a, inkhel hmuhnawm a beisei ngam.
Thlirlet ila
Dortmund tan chuan kum 18 liamtaa Munich-a an champion kha tun thlenga European competition-a an champion awmchhun a ni. Khami ṭum khan Juve tan Zinedine Zidane, Alessandro Del Piero, Christian Vieri leh Didier Deschamps te an inkhel a, Italian club hi rinkai zawk an ni nachungin Dormtmund-in 3-1 in hnehna an chang.
1992/93 UEFA Cup final-ah erawh Juventus-in Dortmund hi double legged final-ah 6-1 in an hneh a, 1994/95 UEFA Cup semifinal-ah Juve bawkin hnehna an chang. Serie A hmahruai mektu Juventus hian 1996 hnuah Champions League-ah an la champion leh lo.
Italian champion
Juventus hi Group A runner up an ni a, Atletico Madrid an tluk lo. Kum 2006 hnuah Juventus hian UCL quarterfinal ṭum khat chiah an la lut a, 2012/13 season khan Celtic sawpin team ṭha pariat zingah an tel - tun hi quarterfinal luh lehna hun ṭha a ni.
Juventus hian an khelmual thar Juventus Stadium-ah record ṭha tak an nei a, European competition ṭum 15 an khelh tawhah vawi khat chiah chak loh an nei (W8 D6 L1). Italy-ah Juve hi Bundesliga club lakah an chungnung zawk a, an record chu W14 D2 L5 a ni.
Double legged inkhelah Juventus hian German club an hmachhawn tawh a, ṭum 12 hnehna an chang a, thum chiah an chak lo.
Dortmund ve thung
Jurgen Klopp team-te hian kum thum a zawna last 16 an thlenna a ni a, Arsenal chungah awmin Group D hmahruaitu an ni.
Dortmund hian Champions League away match hnuhnung pasarih zinga pangaah hnehna an chang. Tun season-ah Emirates stadium-ah tlawm mah se chiang takin Anderlecht (3-0) leh Galatasaray (4-0) an hneh.
Dortmund hian Italy-ah vawi 14 an khel tawh a; vawi li chiah la chakin vawi kua chak lo thung a, vawi khat an inhnehtawk.
Inkhel tur chu
Juventus hi Serie A hmahruaitu an ni a, point 57 hmu tawhin anmahni hnaih bertu Roma aiin point kuain an sang zawk. Italian manager Massimiliano Allegri enkawl Juve hian October thla tawpa Genoa an hneh loh hnuah chak loh hmel an hmu tawh lo a, midfielder Arturo Vidal-a'n Pathianni aṭang khan training a zawm tawh leh tawh bawk.
Juventus hian kartawp khan Atalanta 2-1 in an hneh a, manager Allegri chuan, "Player ṭha rual ka ro chun thei hi ka lawm a, Champions League-ah kan inthlahrunna tur a awm lo. Europe club ṭha zinga chhiar telh kan nih leh theih nan theihtawp kan chhuah ang," tiin a sawi.
Dortmund hian tun hnaiah hartharna an chang a, a zawnin vawi thum an chak. Chutichung chuan Dortmund hi Bundesliga-ah 12-na an la ni pha chauh. Amaherawhchu German club hi table-a an dinhmun aṭanga thlir chi an ni lo. Tun hnaia contract ziak thar Marco Reus bakah Shinji Kagawa, Nuri Sahin leh player thar Kevin Kampl te an che ṭha a, team ṭha an ni.
Zanin hian damlohna vangin Erik Durm, Jakub Blaszczykowski, Mats Hummels leh Jeremy Dudziak te dinhmun a chiang lo, an inlan thei lo a nih pawhin Juventus nena an inkhel tur hi a hmuhnawm tho ang.