World Cup-ah England an chak ve ta

2015 ICC World Cup-ah England-in chak hmel an hmu ve ta. Moeen Ali-a'n England tan century a siam a, England hian run 119-in Scotland an sawp.

Hagley Oval, New Zealand-a inkhelah England an bat hmasa zawk a, over 50-ah run 303 siamin wicket pariat an hloh. Scotland-in theihtawp chhuahin um mah se over 42.2 thleng bak an tlin lo a, an vaia out vekin an rum siam zat chu 184 chauh a ni.

England tan Pakistan a piang, England khua leh tui nihna nei Moeen Ali a che ṭha fal a, ball 107 a hmachhawnah run 128 a vawchhuak. Bowling lamah New Zealand an tum ṭuma mualpho Steven Finn a che ṭha a, run 26 chiah pein wicket thum a la bawk.

Scotland tan run 68 pe a wicket li latu Josh Davey leh run 71 vawchhuaktu Kyle Coetzer-te che ṭha mah se, an ṭhiante'n an puih ṭhat tawk loh avangin an chak zo ta chuang lo.

England hian an match hmasa pahnihah World Cup thlengtu Australia leh New Zealand lakah chiang takin tlawm mah se, an la tum leh tur Afghanistan, Bangladesh leh Sri Lanka te hi tun World Cup-a beisei phak lo vek an nih avangin super eight thlengin turin beiseina sang tak an la nei a. England hian Pathianni zing hian Sri Lanka an hmachhawn ang.