Man City khelmualah Barcelona lut dawn
Zaninah dar 1:15 hian Champions League last 16-ah inkhel hmuhnawm hmuh tur a awm dawn. English champion Manchester City-in Etihad Stadium-ah Barcelona an mikhual dawn.
Manchester City leh Barcelona hi nikum Champions League last 16-ah tho an lo inhmachhawn tawh a, inkhel pahnih belhkhawmah 4-1 in Barcelona an chak.
Inkhel turte dinhmun
Khelmual neitu Man City hian Premier League-a an match hnuhnung berah Newcastle United 5-0 in an sawp a, an phur vanglai tak a ni.
Barcelona hian match 11-ah a zawnin hneh loh an tawng lo a; amaherawhchu Inrinni zan khan Nou Camp-ah Malaga-in an record duhawm tak an tihtawpsak a, rin loh zawk Malaga hi Barca defender Dani Alves back pass sual vangin 1-0 in an chak.
Vawi hnih chiah
Man City leh Barcelona hi vawi hnih chiah an la inkhel a, chu chu nikum Champions League last 16-a an intum kha a ni.
First leg chu Etihad Stadium-ah tho khelh a ni a, Barca 2-0 in an chak. Second leg Nou Camp-ah khelh a ni a, an khelmuala an ngam loh kha khualmualah pawh Man City-in an ngam chuang lo a, 1-2 in an chak lo.
Manchester City hian an khelmualah Spanish team vawi nga an mikhual tawh a, an record chu vawi hnih chak, vawi hnih draw leh vawi khat chak loh a ni.
City hi tun hnaia club ṭha thar an nih avangin Champions League-a an record hi a ropui lem lo a, vawi khat mah quarter final an la lut lo.
Barcelona erawh Champions League-ah vawi li an champion tawh a, Man City hi an hneh thei a nih chuan a zawna Champions League quarter final vawi riat lut thei hmasa ber an ni ang. Barcelona hian nikum khan Manchester United leh Real Madrid record dinglai a zawna Champions League quarterfinal vawi sarih luh chu an lo nihrual tawh a ni.
Barca hretu City boss
City boss Manuel Pellegrini tan Barcelona hmachhawn hi thil thar a ni lo. Chilean coach hian La Liga-ah season kua a châm chhungin Spanish club lian tak tak Villarreal, Real Madrid leh Malaga-te a lo enkawl tawh a, Barcelona hi vawi li chiah a la hneh thei.
Bara coach Luis Enrique tan erawh tun hi English champion Man City a hmachhawn hmasak berna tur a ni thung.
Tute nge khel dawn?
Ma City lamah Barcelona player hlui Yaya Toure hrem vangin a khel thei dawn lo. African Cup of Nations khela Yaya Toure-a than gbo chhunga City result ngaihtuah chuan Toure tel loa City inkhel tur hi an ngaihtuahawm hle.
Swansea City aṭanga Man City zawmtu Wilfried Bony chu Stevan Jovetic aiah Champions League squad-ah dah a ni. A khel a nih chuan Man City tana a Champions League game hmasa ber a khel dawn tihna a ni.
Man City defender tan MSN tia an hminglem an phuahsak Lionel Messi, Luis Suarez leh Neymar-te inkawp lo dan tum hi hna hautak a ni dawn tih hi thil chiang sa a ni. A bik takin English football-a lo tlangnel tawh, Liverpool thiampuipa ṭhin Suarez-a tâl na hlein a rinawm.
Zanina Etihad Stadium-a inkhel tur team pahnih hian March 18-ah Nou Camp-ah second leg an khel leh dawn.
Eng nge an sawi?
Man City manager Manuel Pellegrini chuan, "Nikuma kan tihsual ang khan kan tisual nawn thiang tawh lo. Nikuma kan game-ah khan player kim lo chungin kan khel a, knockout stage-ah goal chhuah hmasa zawk ni chunga player tlem zawk nih bawk si chuan chak a har tawh ṭhin. A tir aṭangin goal khung tumin kan nawr dawn a ni. Inkhel hi minute 90 ang ni loin minute 180 chhung inkhel tur angin kan inpuahchah lawk tur a ni," tiin fimkhur taka inkhelh a pawimawh thu a sawi.
Barca manager Luis Enrique chuan, "Malaga kan hneh lohna khan min inngaihtuah harhtir ngei ka beisei. Khawvela tlar hma nei ṭha ber kan ni tih hi hriat sa a ni. Man City hian an player zawng zawng deuhthaw tlar hnungah an rem mai thei. Mahse, hetiang hi chu kan tawn ṭhan a ni a, kan tlar hma player-te dang thei tur khawpa defence ṭha hi khawvelah an tam lo a ni," a ti.