Fernando Alonso a chesual

Pathianni khan Formula One pre-season test drive Barcelona Cataluny-ah neih a ni a, McLaren driver Fernando Alonso chu a chesual. Helicopter hmangin damdawi in panpui nghal a ni a, CT leh MRI scan-te neih zui nghal a ni.

Kum 33-a upa Spanish driver Alonso hi world champion vawi hnih lo ni tawh a ni a, test drive-ah a tlan ṭhat ṭhin em avangin season thar lo awm turah pawh hian champion beiseiawm ber pawl a ni.

McLaren team boss Eric Boullier chuan, "Test-naah chuan hetiang thil hi a thleng ve fo a, mahse vanneihthlak takin a na em em lo hlauh. A chetsual lai khan a tlan chak lo a, 150kph vel chauhin a tlan a ni. Test hrang hrang result a ṭhat chuan hun rei lo te chhungin damdawi in a chhuahsan kan beisei. Team kan thawkrim a, tun kara test nei leh nghal turin kan inbuatsaih mek a ni," a ti.

Alonso hian Ferrari chhuahsan-in McLaren hi a zawm a, McLaren car thar leh an thawhpui Honda engine hmangin season thar world champion nih a inbeisei hle. Alonso hi season 13 intlansiak tawhin ṭum 32 zet tlan chak ber a ni tawh bawk.