Everton leh Leicester inhnehtawk

Pathianni zan khan Everton leh Leicester City-te goal hnih ve ve khungin an inhnehtawk a, Leicester hi Premier League table mawngah an awm chhunzawm zel.

Scottish forward Steven Naismith goal thun hmangin minute 57-naah Everton-in hma an hruai a, kum 28-a upa Naismith hian tun season-ah Arsenal, Chelsea leh Manchester City lakah goal a lo khung tawh bawk.

Minute 63-naah Lei­cester-in David Nugent hmangin an sut a, English forward hi a naupan lai aṭanga Everton fan a ni a, a club ṭan lamah goal a khung. Nugent hian tun season-ah a inzir chhuahna club Liverpool lamah a khung a, tun season-ah Merseyside club pahnih lakah goal a khung ve ve.

Argentine Esteban Cambiasso chuan Minute 70-naah Leicester hmahruaina goal a khung a, mikhual team hi chak mai tura an lan laiin hun tawp dawn ṭepah Matthew Upson chuan an mahni goal-ah a thun palh a, 2-2 in inkhel a tawp.

Engnge an sawi?

Everton manager Roberto Martinez chuan, "Kar laihawlah Euro­pe-a kan inkhelh avangin inkhelh a harsa deuh a, mahse kan goal chhuah pahnih kha chu kan fimkhur loh vang a ni. League-ah hian a him chin a sawi ngawt theih loh a, inthlahdah loin a sang thei ang ber thlen kan tum tur a ni," tiin a sawi.

Leicester manager Nigel Pearson chuan, "Ka theihna leh thiamna zawng zawng he club tan hian ka hlan a, mahse kan vanduai a kaltluang rih em a ni. Kan khel chhe lem lo a, hun tawp dawnah kan vanduai palh mai zawk a ni." tiin vanduai vang chauha point thum hmu lo an nih thu a sawi.