Liverpool-in top four an hnaih zel

Pathianni zan khan Liverpool-in rawlthar duhawm pahnih Philippe Coutinho goal ropui leh Raheem Sterling finishing tawih tak hmangin Southampton 2-0 in an hneh.

Point 45 hmutu Liverpool hi parukna an ni a, point 47 hmua palina ni mek Manchester United an hnaih tawh hle.

St Mary's Stadium-a inkhelah hian minute thumna lekah Brazilian midfielder Coutinho chuan yard 25 aṭangin goal ropui a khung a, Saints fan-te an hawihai.

Southampton an zam bik mai lo a, Liverpool tlar hnung an rum ṭhaih ngun hle. Amaherawhchu Liverpool keeper Simon Mig­nolet chet ṭhat an nang hlauh a, goal an khung thei lo.

Southampton tan Filip Djuricic chuan penalty hlawh­chhuah theihna hun ṭha vawi hnih nei mah se, referee-in a ham tlat lo. Southampton defender tan Sterling a hnawksak a, first half-ah hian penalty area-ah tihtluk ni mah se referee-in penalty a pe lo a, 1-0 in chawlh lawk an hmang.

Second half-ah Liverpool boss Brandon Rodgers chuan team a rem dik ta a, minute 62-a Daniel Sturridge rawn tlan luh hnuah Southampton tlar hnungin hna an ngah lehzual. Minute 73-naah khel ṭha em em Sterling goal a hlawhchhuak ta nge nge a, Alberto Moreno nen mawi taka ball an inpek hnuah Morgan Schneiderlin chuan ball a lo khawih per a, hei hi Sterling chuan goal-ah a chantir. A tawpah Liverpool 2-0 in an chak a, Champions League khelh beiseina a nung thar zel.

Reds an vul

Liverpool hian season ṭan tir lamah beisei angin khel lo mah se, tun hnaiah an khel ṭha tawlh tawlh. Season chawhma lam match 17-a point 22 chauh an hlawhchhuah theih laiin tun hnai match kua an khelhah point 23 an hmu thung.

Kum 2015 bikah Liverpool-in Premier League-ah point an hmu sang ber a, kuminah league-ah hneh loh an la tawng lo.

Eng nge an sawi?

Liverpool manager Rodgers chuan, "Kan tan chuan hnehna ropui tak a ni a, goal ropui tak pahnih kan hmu a, defender te'n goal an venghim ṭha em em bawk a ni. Kan khelmual leh khualmualah Southampton kan hneh thei a, hei hian kan khelh ṭhat zia a pholangin ka hria," a ti.

Southampton manager Ronald Koeman chuan, "Liver­pool ai khan kan khel ṭha zawk a, ball pawh kan chang tam zawk. Mahse, football-ah chuan goal khung tam zawk an chak ṭhin miau si. Penalty tura ngaih chiang tak pahnih pek kan ni lo bawk. Kan result-ah lawm lo mah ila kan khelh dan erawhin min tilawm hle a ni," a ti.