Qatar World Cup thlasikah khel dawn?

Kum 2022-a Qatar-in FIFA World Cup a thlen tur chungchangah thu thar a awm leh ta. FIFA hruaitute chuan World Cup khelh hun pangngai nipui laiin football inelna sang ber hi khelh theih an beisei lo a, thlasik lai November leh December velah World Cup match khelh a ṭul tur thu an sawi.

Qatar khawpui Doha-ah FIFA in World cup zir chiang tura a din committee chuan thlasik a World Cup neih rawtna hi FIFA hnenah an thlen a, FIFA committee chuan March 19 leh 20 a Zurich khawpuia meeting an neih hunah thlasik a neih hi an pawm dawn leh dawn loh an ngaihtuah ang.

Qatar-ah hian khawlum vanglaiin 40C hial a thlen ṭhin laiin December velah chuan 25C velah a tla ṭhin thung. Nipui laia khelh a nih chuan khawlum lutuk hian player-te hriselna a nghawng FIFA taskforce chuan an hlau a ni.

Qatar-in World Cup thlen an dil tirh khan nipui laia thlen inhuam chungin an dil. An thleng dawn ta cheng a, FIFA hian Qatar ram boruak lum lutuk vangin World Cup chu nipui laia khelh chiah an ngai lo a ni.

Asia Football Confederation hruaitu Sheikh Salman bin Ebrahim Al-Khalifa chuan, "European league lian leh club lian tam takin an duh zawk dan anga May thla bawr vela khelh hi Qatar boruak lum dan ngaihtuahin a harsa maithei a ni," a ti.

Sheikh Salman chuan, "Europe club-te dinhmun chiah kan ngaihtuah thei lo a, khawvel hmun hrang hranga club-te inhuam dan pawh lak a ngai ve tho a ni," tiin Europe club tam zawk duhdan May thlaa World Cup khelh chu an pawm nghal mai loh thu a sawi.

World Cup thlengtu tur Qatar erawhin an theihtawp an chhuah, Qatar 2022 World Cup organising committee chairman Hassan Al Thawadi chuan, "Eng thutlukna pawh siam se, engtik hun pawha World Cup thleng turin kan inpeih a ni," an ti thung.

Qatar hian World Cup thlen a dil lai khan stadium zawng zawng leh training ground-te air conditioned vek a nih tur thu an sawi.

Hemi chungchang hi sawiin Al Thawadi chuan, "World Cup thlen kan dil laia kan dinnaah khan kan la ding reng a, boruak nuam tak hnuaia World Cup khelh a nih theih nan hma kan la reng a ni," tiin World cup chu nipui lai pawha thlen an inhuam thu a sawi.

Thlasik laia World Cup khelh tur chungchang hian boruak a siam lian nghal hle a, a hma ang thoin European club liante chuan an duh lo lehin a rinawm. Hetih lai hian Europe-a football thuneitu sang ber UEFA president Michel Platini chuan thlasik laia World Cup khelh hi a thlawp thung.

European Clubs Asso­ciation leh European Pro­fessional Football Leagues chuan thlasika World Cup khelh chungchang sawi rik a nih ṭan tirh aṭang khan an duh loh thu an lo tlangaupui tawh a, May thla vela khelh dan tur duangin plan mumal tak FIFA-ah an lo thehlut tawh bawk.

Europe club-te hian 2022 World Cup-ah player an thawh hnem leh berin a rinawm a, 2014 World Cup-ah khan players 75% kha chu European club a khel an ni. An ngaihdan hi namnul ngawt chi a ni lo ang.

2022 World Cup hi thalsikah khelh a nih dawn chuan January leh February-ah Qatar hian Winter Olympic an thlen dawn avangin November leh December-ah an khelin a rinawm.